30 tamyz – Qazaqstan Respýblıkasynyń Konstıtýsııasy kúni “Qazaq eli” monýmentiniń janyndaǵy elimizdiń bas alańynda áskerı sherý ótedi.

Sherýge daıyndyq joǵary 30 tamyz – Qazaqstan Respýblıkasynyń Konstıtýsııasy kúni “Qazaq eli” monýmentiniń janyndaǵy elimizdiń bas alańynda áskerı sherý ótedi. Sherýge Qarýly Kúshterden Qurlyq áskerleriniń, Áýe qorǵanysy kúshteriniń jáne Áskerı-teńiz kúshteriniń, sondaı-aq Ishki ister mınıstrliginiń, Ulttyq qaýip­sizdik komıtetiniń, Tótenshe jaǵdaılar mınıstrliginiń jáne Respýblıkalyq ulan­nyń bólimsheleri qatysady. Áskerı sherýge qatysýshylardyń jalpy sany 2400 adamdy quraıdy. Olardyń qatarynda ofıserler, kelisim-shart boıynsha áskerı qyzmetshiler, áskerı oqý oryndarynyń kýrsanttary men merzimdi áskerı qyzmet sarbazdary bar. Sherýge qatysýshylardy ornalastyrý úshin Astana mańyndaǵy Qyrqynshy stansadaǵy 68665 áskerı bólim aýmaǵynda arnaıy dalalyq lager jasaqtalǵan. Munda 40 shatyrdan turatyn qalashyqta qajetti ınfraqurylymnyń bári jasalǵan. Áskerı­ler úshin dalalyq ashana, medısı­nalyq beketter, bir sózben aıtqanda, barlyq jaǵdaılar bar. Qurlyq áskerleriniń bas qolbasshysy, sherýge jetekshilik jasaıtyn general-maıor Murat Maıkeevtiń aıtýynsha, áskerı sherýge qatysýshylardyń daıyndyǵy joǵary. Áskerıler elimizdiń bas alańyndaǵy paradqa qatysýǵa saqadaı saı tur. Bıylǵy paradqa 2400 adam qatysatyn bolsa, soǵan qajetti toptardy jasaqtaý úshin Qarýly Kúshterdegi laıyqty degen áskerı qyzmetshiler irik­telinip alyndy. Qazir olar lager jasaq­talǵan 5 shildeden bastap kún saıyn daıyn­dalýda. 30 tamyz kúni respýblıka jurtshy­lyǵy olardyń nátıjesine kýá bolady. Al Astananyń mańynda jasaqtalǵan dalalyq lagerde 3200 adam ornalasyp otyr. Sonyń ishinde paradqa 2400-i ǵana qatysatyn bolady. Qazir lagerde 285 áskerı tehnıka ornalasqan. Áskerı paradqa osylardyń bári qatysady. Qurlyq áskerleri shtab bastyǵynyń orynbasary, lager bastyǵy Erkebolat Ospanovtyń aıtýynsha, bıylǵy paradqa qatysý úshin árbir garnızonda áskerı boryshyn óteýshiler men birinshi kýrs kýrsanttary iriktelinip alynǵan. Solardyń bári erteden keshke deıin úsh mezgil tamaqtanyp, qajetti jattyǵýlar jasap sherýge jan-jaqty daıyndalýda. Paradqa qatysýshylardy aýyz sýmen qamtamasyz etýde barlyq qolaıly jaǵdaı jasalǵan, al olardy tamaqtandyrý máselesimen “Nur ıslam” fırmasy aına­lysýda. Bıylǵy paradtyń taǵy bir ereksheligi, oǵan Otan qorǵaý jolyndaǵy jaýyngerlik tapsyrmalardy erlermen birge oryndap júrgen áskerı áıelderden quralǵan toptar tuńǵysh ret qatysqaly otyr. Sherýge 150-den astam qarý-jaraq pen áskerı tehnıka jáne 66 avıasııalyq tehnıka qatysady dep josparlanýda. Sonyń ishinde mehanıkalandyrylǵan lekte “Land Rover”, Qarýly Kúshterdegi T-72 B tankileri, BMP-2 jaıaý áskerler jaýyngerlik máshınesi, zenıtti-zymyrandy keshender, “Hammer” avtokólikteri, jetildirilgen bronetrans­por­terler, D-30 120 mıllımetrlik gaýbısalar, “Msta-B” 152 mm. gaýbısasy bar artıllerııalyq batareıa, “Grad”, “Ýragan” syndy dúrkindete oq atatyn reaktıvti júıeler, artıllerııalyq jáne zymyrandyq qarýlar sapyndaǵy “Smerch”, “Tochka-Ý” sııaqty qýatty qarýlar bar. Dastan KENJALIN.