Qazaq qyzy – olımpııa oıyndarynyń chempıony

Shymkentte uly sazger Shámshi Qal­da­ıaqovtyń ánde­ri­men ádiptelip “Ar­ys jaǵasynda” atty ret­ro-festıval ót­ken. Qazaqstannyń án ónerindegi jul­dyz­dary aspandaǵy jy­myńdaǵan jul­dyz­darǵa daýysyn qo­syp, qalany ba­qyt qushaǵynda bal­qytqan edi. “Arys jaǵa­syn­da” áni Arys qala­syn­da týǵan qazaq­tyń qaısar qyzy­nyń Sın­gapýrdegi Olımpııa oıyndarynda altynnan olja salýyna ulasty. Aýyr atletshi Jazıra Japparqul 63 kılo salmaq dárejesinde serpe jáne julqı kóterýden qosqanda 205 kılo kóterip, birinshi orynǵa shyqty. Elimizdiń aýyr atletıka quramasynyń basshylary 16 jasynda eresekter arasyndaǵy álem chempıonatynyń dýyna túsip, álem chempıonatynyń bas báıgesin julyp alǵan Zúlfııa Chınshanloǵa úlken úmit artyp edi. Sol Zúlfııa bul joly kúmis medaldyń asýynan asa almady. Aýyr atletıkadan Olımpııa oıyndary, álem chempıonatynda júlde alǵan qazaq qyzy túgili er azamatynyń joq ekendigin eskerseńiz, Jazıra Japparqul tuńǵysh chempıon. Arys qalasynan shyqqan alyp qyzdyń ákesi Ábdirahman, anasy Kúlaıhannyń dál qazir qońyr qulynshaǵy úshin shyǵarda jany basqa. – Qyzym sporttyń osy túrin tańdaǵanda qyz balaǵa laıyq emes, tastasańshy dep aıtqym kelgen, – deıdi ana­sy Kúlaıhan. – Biraq, alǵan betinen qaıtpaıtyn qaı­sarlyǵyn bilemin. Endi, mine, elimizdiń abyroıyn as­qaq­­tatty. Ata-ana úshin osydan artyq qandaı abyroı kerek. Jazıra bir áýlettiń emes, Qazaqstannyń atyn álemge áıgiledi. Búginde Jazıra oblystyq aýyr atletıkadan olımpıada rezervterin daıyndaıtyn sport mek­tebinde Rashıd Tólegenovtiń táliminde jattyǵady. Baqtııar TAIJAN, Ońtústik Qazaqstan oblysy.