Sasqany ma, salbyraǵany ma?

Gazetimizdiń tilshiler qosynyna Petro­pavl qala­synyń turǵyny S. Mustafına telefon  arqyly habarlasyp, qalaǵa kire beris toǵyz joldyń tora­bynda adam sengisiz  jarnamanyń ilinip turǵanyn jet­kiz­di. Bardyq. Kórdik. Jurtshylyq árli-berli kóp qatynaıtyn Mamlıýt tas joly boıynda  “Reseıge qosh keldińizder!” degen jarnamalyq bılbord “meni kórdińder me?” degendeı,  aspanmen talasa asqaqtap tur.  Iri áriptermen órnektelip, nazardy eriksiz aý­dartady. Aı-kúnniń amanynda Qazaqstan men Reseıdi shatastyryp alǵan kim eken dep izdeý saldyq. Sóıtsek, eldi alataıdaı shapqynǵa túsirgen  “Arhstroı” JShS bolyp shyqty. Agenttik basshy­lary banner syzba jobasynyń Almatydaǵy bas kompanııada bekitilgenin, ózgertýge quqyqtary joǵyn aıtyp zar ılegenimen, ishki saıasat bólimin ılandyra almady.  Keıin anyqtalǵandaı,  mádenıet jáne til­derdi damytý bóliminen jazýlardyń zań talaptaryna sáıkestigine ǵana kelisim alyp, reseılik bank fılıaly janyna ilemiz degen ýádelerinen taıqyp shyǵa kelgen. Osylaısha zańsyz is-áreketterge tosqaýyl qoıylyp, soraqy jarnama alynyp tastaldy. TILShI TÚSINIKTEMESI: Petropavl qalalyq ishki saıasat bólimi  múddeli mekeme-uıymdarmen birlese otyryp jarnamalardy, habarlandyrýlardy, mańdaı­sha­daǵy jazýlar men ataýlardy, basqa da kórneki aqparattardy birizge túsirý, memlekettik tilde jáne saıası jaǵynan durys jazylýyn qadaǵalaý maqsaty­men tekserý reıdter júrgizýdi  qolǵa aldy. Bul—óte quptar­lyq shara. О́ıtkeni, oblys ortalyǵynda basqa tildegi jazýlardan áli de kóz  súrinedi. Osyndaı keleńsiz­dikterge toqtaý salmasa, memlekettik tilimizge shekesinen qaraı­tyn­dardyń qatary azaıady degenge  sený qıyn. Endi myna “qyzyqty” qarańyz. Orny  úńireıip, bos qalǵan bannerde “1941-1945” degen jazý paıda bolypty. Bezendirilýi men sapasynyń tómendigine qaraǵanda,  kórneki jarnama paıda kózine aınalyp ketken sekildi. Álde Uly Jeńis  merekesi esterine endi ǵana tústi me eken? О́mir ESQALI, Petropavl.