Aksııa jalǵasady

Jańa oqý jyly qarsańynda jer-jerde mektepke daıyndyq jumystary qyzý júrgizilýde. Mundaı daıyndyq naýqanynan “Nur Otan” halyqtyq-demokratııalyq partııasy da syrt qalmady. Keshe partııa Tóraǵasynyń birinshi orynbasary Nurlan Nyǵmatýlınniń qatysýymen ótken sharada balalarǵa mekteptik qural-jabdyqtar úlestirilip berildi. Kópbalaly jáne turmysy tómen otbasylarǵa qoǵam nazaryn aýdarý maqsatynda partııa elimizdiń barlyq aımaqtarynda “Balalardy mektepke jınaıyq!” atty qaıy­rym­dylyq aksııasyn ótkizýde. Osy­ǵan oraı myńdaǵan azamattar aksııaǵa qoldaý kórsetip, shara aıa­synda turmysy tómen jáne kóp­ ba­laly otbasy balalaryna óz syı-sııapattaryn jasaýda. Partııanyń Ortalyq apparaty aldynda ótken is-shara da sonyń bir kórinisi boldy. Osynda jınalǵan 200 bala aýa raıynyń salqyndyǵyna qara­mas­tan, ózderine tıesili syı-sııa­patty taǵatsyzdana kútti. Ata-analar men balalar aldyna shyqqan “Nur Otan” HDP Tóraǵa­sy­nyń birinshi orynbasary Nurlan Nyǵmatýlın sóz sóıledi: “Elba­sy­myz, partııamyzdyń Tóraǵasy Nursultan Ábishuly Nazarbaev saıasatynyń arqasynda Qazaqstanda jańa mektepter qurylysy aıaqta­lyp, paıdalanýǵa berilýde. Osyn­daı sharalar sizderdiń bolashaq­tary­ńyz úshin jasalýda”, – dedi ol. Jınalǵandardy aldaǵy bilim merekesimen quttyqtaǵan N.Nyǵ­ma­týlın sózin ári qaraı sabaqtaı kelip, bylaı dedi: “Árıne, mektepke daıyndalý degen de ońaı sharýa emes, sol úlken jumysty jeńilde­tý­ge úles qosý úshin búgin ózderi­ńiz­di shaqyryp otyrmyz. Jańa oqý jylynyń sizder úshin tabysty bolatynyna senemiz, barshańyzǵa zor densaýlyq, mol baqyt tileımiz!”. Shynynda da, jańa oqý jyly qarsańynda qolǵa alynǵan osyndaı ıgi sharalar balalar kóńiline demeý, ata-analaryna kómek bolary aıtpasa da túsinikti. Olaı bolsa, “Nur Otannyń” bul ıgi bastamasy ózgelerge de qozǵaý salýy tıis. Uıymdastyrýshylardyń aıtýynsha, aksııa tamyz aıynyń sońyna deıin jalǵasatyn bolady. Asqar TURAPBAIULY.