Keshe Premer-Mınıstr Kárim Másimovtiń tóraǵalyǵymen selektorlyq keńes, artynsha Úkimet otyrysy bolyp ótti.
Selektorlyq keńeste Elbasynyń quqyq qorǵaý qyzmeti men sot júıesiniń tıimdiligin arttyrý týraly Jarlyǵyn júzege asyrý jónindegi Úkimet ázirlegen tıisti qaýlynyń jobasy qaraldy. Bul jóninde baıandama jasaǵan Qarjy mınıstri Bolat Jámishevtiń aıtýynsha quqyq qorǵaý qyzmetin júzege asyratyn memlekettik organdar qurylymyna birqatar ózgerister engizilmek. Sonyń ishinde Ishki ister mınıstrliginiń aıasynda kóshi-qon polısııasy komıteti qurylatyn bolady. Osyǵan baılanysty Eńbek jáne halyqty áleýmettik qorǵaý mınıstrliginiń atalǵan máselege qatysty birqatar fýnksııalary Ishki ister mınıstrligine beriledi. Sonymen qatar Ishki ister mınıstrliginiń kóliktegi departamentteri biriktirile otyryp, qaıta uıymdastyrylatyn bolady. Endigi kezekte medısınalyq aıyqtyrý qyzmeti Densaýlyq saqtaý mınıstrligine, al kámeletke tolmaǵandardy ýaqytsha oqshaýlaý, beıimdeý jáne ońaltý ortalyqtarynyń qyzmetteri Bilim jáne ǵylym mınıstrligine tapsyrylady. Erekshe qorǵalatyn mańyzdy strategııalyq nysandardy qorǵaý fýnksııalaryn qospaǵanda basqa kúzet qyzmetteriniń fýnksııalary básekelestik ortaǵa berilmek.
Qabyldanǵan qaýlyǵa baılanysty Úkimet basshysy birqatar tapsyrmalar berdi. Atap aıtqanda, Ishki ister mınıstrligi qaramaǵynda kóshi-qon polısııasynyń qurylýyna oraı Ishki ister mınıstrligi men Tótenshe jaǵdaılar mınıstrligi birlese otyryp naqty josparlar ázirlep usynýy qajettigin aıtty. Kóshi-qonnyń keıde josparly, keıde jospardan tys júrgiziletindigin eske sala kele atalǵan máselede naqty baǵyttardy aıqyndap, tıisti sharalardy ázirleýdi tapsyrdy.
Osynyń aldynda Úkimet elimizdiń aýmaǵynda, ormandy-dala alqaptarynda órt qaýipsizdigin qamtamasyz etý máselesin qaraǵan bolatyn. “Jut jeti aǵaıyndy” dep halqymyz aıtqandaı, túrli tabıǵı apattar órt qaýpimen ǵana shektelmeıtindigi belgili. Muny bıyl jazda bolǵan birqatar oqıǵalar aıqyndap berdi. Elimizdiń ońtústik-shyǵysyndaǵy sý tasqynyna baılanysty birqatar eldi mekender zardapqa ushyrap, memlekettiń ekonomıkalyq qýatynyń arqasynda olar jedel qalpyna keltirilýde. Sondyqtan Úkimet selektorlyq keńeste osyndaı oqıǵalardyń aldyn alý, qaýipsizdigin qamtamasyz etý máselelerin keshendi túrde qarastyrýǵa múmkindik beretin azamattyq qorǵanys salasyn nyǵaıtýǵa baǵyttalǵan sharalardy belgiledi. Oqıǵa oryn ala qalǵan jaǵdaıda halyqqa habarlandyrý qyzmetin nyǵaıtý, órt sóndirý quraldaryn jańartý, sý qoımalaryn bekitý jumystaryn kúsheıtý, apattan qutqarý qyzmetinde erikti jasaqtar qurý, jer silkinisi oryn ala qalǵan jaǵdaıda odan az shyǵynmen shyǵý úshin túrli ǵımarattardyń beriktigin arttyrý, osyǵan qatysty normatıvterge ózgerister engizý, qurylys jumystarynyń sapasyna baqylaýdy kúsheıtý sekildi sharalardy keshendi túrde qarastyrý jóninde uıǵarym jasalyndy.
Selektorlyq keńes aıaqtalysymen Úkimet otyrysy jalǵasty. Onda elimizde hımııa óndirisin jáne máshıne jasaý salasyn damytý jónindegi baǵdarlamalardyń jobalary qaraldy. Bul eki másele jóninde de Indýstrııa jáne jańa tehnologııalar mınıstriniń orynbasary Albert Raý baıandama jasady.
Hımııa óndirisin damytý baǵdarlamasy 2010-2014 jyldar aralyǵyn qamtıdy. Ol – baǵdarlamany júzege asyrý úshin negizgi resýrstardy ázirleý, ıaǵnı salaǵa qatysty tabıǵı baılyqtardy barlaý, izdestirý jumystaryn nyǵaıtý, salany tabıǵı gazben, elektr qýatymen qamtý, hımııa ónimderiniń eksportyna qoldaý jasaý, osyǵan deıingi ázirlengen normatıvti bazalardy retke keltirý, ónim ázirleýde Eýroodaq standarttaryn engizý, salany bilikti kadrlarmen qamtý sekildi birneshe baǵyttan turady.
Al máshıne jasaý salasyn damytý baǵdarlamasy negizinen osy sektordaǵy qazaqstandyq úlesti arttyrý máselesin qarastyrady. Albert Raýdyń aıtýynsha qazirgi kúni máshıne jasaý salasy ónimderinde elimizde eksporttyń kólemi ımporttyń kóleminen 6 ese tómen bolyp otyr. Qazaqstan jylyna 15 mıllıard dollardyń máshıneleri men oǵan qajetti buıymdardy ımporttaıdy eken. Endigi kezekte osy olqylyqtyń ornyn toltyryp, qoldan keletin ónimderdi óz ishimizde jasaýymyz qajet. Munyń jaqsy mysaldaryn “Qazaqstan temir joly” AQ-tyń ımport almastyrý baǵdarlamasynyń júzege asýynan ańǵarýǵa bolady. Endi osyndaı belsendi áreketterdi elimizdiń munaı-gaz, aýyl sharýashylyǵy máshınelerin jasaý óndiristerine de tereńirek engizýimiz qajet.
Atalǵan máselege baılanysty birqatar Úkimet músheleri men sarapshylar sóz alyp, ázirlenip otyrǵan baǵdarlama jobalarynyń maqsaty, oryndaý tetikteri aıqyn ekendigin aıtyp, olarǵa qoldaý bildirdi. Eki baǵdarlama da qabyldandy.
Suńǵat ÁLIPBAI.
* * *
Qyzmettestik qyrlary qaraldy
Keshe Premer-Mınıstr Kárim Másimov Tájikstan Respýblıkasynyń Syrtqy ister mınıstri Hamrohon Zarıfımen kezdesti, dep habarlady Premer-Mınıstrdiń baspasóz qyzmeti. Kezdesýde ekijaqty saýda-ekonomıkalyq qyzmettestikti damytý, sonyń ishinde birlesken jobalardy júzege asyrý úshin Qazaqstan-Tájikstan tikeleı ınvestısııalar qoryn qurý máseleleri talqylandy.
