Memleket basshysy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda «2018 jyl – elordamyz Astananyń 20 jyldyǵyn atap ótetin mereıtoıly jyl. Bas qalamyzdyń qalyptasýy jáne Eýrazııanyń mańyzdy damý ortalyqtarynyń qataryna qosylýy – barshamyzdyń ortaq maqtanyshymyz», dep atap kórsetti.
Osyǵan baılanysty, Alash jurtynyń asqaq aıbaryna aınalǵan arý Astananyń 20 jyldyq merekesine arnalǵan sharalar jyl boıy jalǵasýda. Jaqynda osyndaı bir shara elordadaǵy Ortalyq balalar jáne jasóspirimder kitaphanasynda «Asqaqtaı ber elimniń Astanasy» aıdarymen ótti.
Oqyrmandar kóp jınalǵan merekelik sharany Ortalyqtandyrylǵan kitaphanalar júıesiniń bólim meńgerýshisi Saǵynysh Seıdahmetova ashyp, júrgizip otyrdy. Bas qalamyzdyń osynaý qalyptasý kezeńindegi eleýli jyldar týraly estelikterdi eske ala kelip, osy bir shejireli oqıǵalardyń bel ortasynda júrgen búgingi ardager astanalyqtarǵa sóz berdi. Alǵashqy sózdi kezinde Astana qalasyndaǵy halqymyzdyń birtýar perzenti Sáken Seıfýllınniń murajaıyn ashyp, osy bir tárbıe ortalyǵynyń irgetasyn qalaǵan qurmetti zeınetker Roza Asylbekovaǵa aldy. Roza Imanǵalıqyzy osydan 20 jyl buryn alǵash Alataý baýraıyndaǵy Almaty qalasynan Saryarqa tósindegi Aqmolaǵa kóship kelgen elordamyzdyń irgetasynyń qalanýy, qalyptasýy týraly ózi kýá bolǵan oqıǵalarmen bólisti. Qazaq arhıtektorlar odaǵynyń prezıdenti Serik Rústembekov sáni men sáýleti jarasqan búgingi bas qalamyzdyń qaıtalanbas arhıtektýrasyn qalyptastyrýda Elbasynyń erekshe eńbegin atap kórsetip, sáýlet óneriniń ozyq týyndylary bolyp tabylatyn keıbir ǵımarattardyń qurylysyn, salyný tarıhyn tilge tıek etti.
Sonymen birge, mazmundy basqosýǵa Astana balet teatry dırektorynyń orynbasary Dúısen Musabekov, Astana opera jáne balet teatry murajaıynyń meńgerýshisi Áfrıza Qusaıynova, «Egemen Qazaqstan» gazetiniń qyzmetkeri Jylqybaı Jaǵyparuly, «Astana aqshamy» gazeti bas redaktorynyń birinshi orynbasary Ǵalym Qojabekov, keshegi Aqmola, búgingi Astanadaǵy talaı býyn jas ónerpazdardy tárbıeleýde erekshe eńbek sińirgen mýzyka salasynyń ardageri, №1 mýzyka mektebiniń ulaǵatty ustazy Ospan Súleımenov qatysyp, bas qalamyzdyń 20 jyldyq damý shejiresindegi ózderi kýá bolǵan oqıǵalar týraly estelikterimen bólisti. Kezdesýge qatysqan ardagerler jas oqyrmandar tarapynan qoıylǵan sansyz suraqtarǵa mazmundy jaýap berdi.
Astana qalasyndaǵy Ortalyqtandyrylǵan kitaphanalar júıesine kiretin Ortalyq balalar jáne jasóspirimder kitaphanasy jas astanalyqtardyń rýhanı dúnıetanymyn keńeıtetin iri ortalyqtardyń biri. Búginde bul kitaphanada 162 myńnan astam kitap qory bar.Oqyrmandar sany 8 myńnan asady. О́z isiniń mamany Jazıra Edigenova basqaratyn balalar kitaphanasy jas urpaqqa jan jaqty tárbıe berip, bilim qazynasymen sýsyndatýda erekshe eńbek sińirip keledi.
Mádına JÁLELQYZY,
«Egemen Qazaqstan»