Elordadaǵy Ulttyq mýzeıde «Arqaıym – qalalar eli: keńistik pen beıneler» atty fotokórme ashyldy.
Reseı Federasııasy Chelıabi oblysynyń Qazaqstanǵa jaqyn ońtústik aımaǵy Úlken Qaraǵandy jáne О́tegen ózenderiniń quıylysynda ornalasqan orta qola dáýirdiń biregeı arheologııalyq eskertkishi – Arqaıym álemge tanymal asa iri mádenı mura nysandar qataryna jatady.
Kórmeni uıymdastyrýshy tarap ókili Eýropalyq jaratylystaný ǵylymdary akademııasynyń akademıgi Iýrıı Zýıkovtyń paıymynsha, elordalyqtar nazaryna usynylyp otyrǵan bul shara áýeli «Qalalar elin» alǵash ret ashqan ataqty arheolog G.B.Zdanovtyń 80 jyldyq mereıtoıymen oraılasyp otyr eken.
Buǵan deıin Reseıdiń 12 qalasyn aralap, bizge jetken jádigerler qatarynda: «Baqta», «Chekataı», «Kúısak», «Jýrýmbaı», «Syntasty», «Andreev», «Parıj», «Qyzyl», «Tasty qamba», «Sarym-Saqly», «Qamsyty», «Bersýat» qatarly 21 qonystyń geografııalyq ornalasý kartasy men qonys sýretteri jáne «Arqaıym» eskertkishiniń pıramıda keskini men mýzeıge aınalǵan arheologııalyq qazyndysynyń da fotolary bar eken.
Sonymen qatar bizdiń zamanymyzdyń II-III ǵasyrǵa tán sarmat áıeliniń beıiti, arheologııalyq qazba jumystarynyń túrli kezeńdegi aerotúsirilimderi, joǵarydaǵy qalashyqtardyń dalalyq keskin-beıneleri qatarly jádigerler kórermen kózaıymyna usynylsa, fotosýretter ekspozısııasyna arnalǵan stendterdegi kórkem tabıǵat peızajdary da kóńil sergiterlik kórkem mánge ıe ekenin ańǵardyq.
Beken QAIRATULY,
«Egemen Qazaqstan»