Atyraýda aqyn toıy saltanat qurdy. Poezııa padıshasy Farıza Ońǵarsynovanyń týǵanyna 80 jyl tolýyna arnalǵan aptalyq bastaldy. Oblys ortalyǵynyń eń kórnekti jerine ornatylǵan aqyn eskertkishine gúl shoqtaryn qoıý rásiminen bastaý alǵan sharalar legi tórt kúnge sozylady.
Oblys ákimdiginiń qoldaýymen mádenıet, arhıvter jáne qujattama basqarmasynyń tapsyrysy boıynsha «Biregeı» qoǵamdyq qory shyǵarǵan «Ar men aqyn» derekti fılmi, «Jyr – meniń jalǵyz tarlanym» aýdıoóleńder jınaǵy tanystyryldy.
Halel Dosmuhamedov atyndaǵy Atyraý memlekettik ýnıversıteti – Farıza Ońǵarsynova bilim alǵan joǵary oqý orny. Elimizge belgili zııaly qaýym ókilderi, óńirdegi ǵalymdar, aqyn-jazýshylar men jastar qatysqan respýblıkalyq ǵylymı-tájirıbelik konferensııanyń osy bilim ordasynda ótýi de zańdylyq.
– Farıza Ońǵarsynova Atyraý topyraǵynyń tól perzenti, óńirimizdegi bilimniń qara shańyraǵy – H.Dosmuhamedov atyndaǵy Atyraý memlekettik ýnıversıtetiniń alǵashqy túlekteriniń biri. Ol qarymy mol talant ıesi, sóz óneriniń kemeline jetken sýretker. Farıza shyǵarmashylyǵynyń búkil bolmysyn, ereksheligin jetkizip aıtý óte qıyn, biraq osy konferensııa Farıza álemine aıqyn jol ashatyn, ǵylymı turǵyda baǵa beriletin, rýhanı mańyzy zor shara bolady degen senimdemin, – dedi oblys ákiminiń orynbasary Aıgúl Ájiǵalıeva.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń «Týǵan jer» baǵyty aıasynda uıymdastyrylǵan «Farıza Ońǵarsynova – kórnekti aqyn, qoǵam jáne memleket qaıratkeri» atty respýblıkalyq ǵylymı-tájirıbelik konferensııada alǵashqy baıandamany fılıologııa ǵylymdarynyń doktory, Atyraý memlekettik ýnıversıtetiniń professory Qadyr Júsip jasady. «О́tken ǵasyrdyń alpysynshy jyldarynyń aıaq kezinde qazaqtyń poezııa áleminde bir jarqyldaǵan naızaǵaı oınady. Baǵzy buıyǵylyqty joıyp, aqyn qyzdar arasynda poezııa aspanyna sol jaryqty alyp kelgen Farıza bolatyn» – dep atap ótti ǵalym.
Fılologııa ǵylymdarynyń doktory, belgili ǵalym Amantaı Shárip te osy pikirdi qýattap, «Shyn máninde, Farıza Ońǵarsynovanyń «poezııa planetasy» – ony kózi de, kóńili de udaıy saǵyna, sarǵaıa izdep turatyn eliniń rýhanı galaktıkasyndaǵy kómeski, kúńgirt tartpas shamshyraqtardyń biri. Ábdilda Tájibaev aıtqandaı, «Farızada halyqtyq rýh bar, ol elimen birge, qazaǵynan bólinbegen aqyn», – dedi.
Konferensııada «F.Ońǵarsynova jáne qazaq poezııasynyń kórkemdik álemi», «Aqynnyń azamattyq ustanymy jáne qoǵamdyq qyzmeti», «Aqyn shyǵarmashylyǵyn oqytýdyń ózektiligi jáne tárbıelik máni» seksııalary boıynsha baıandamalar tyńdaldy.
Sharaǵa Qazaqstan Jazýshylar odaǵynyń basqarma tóraǵasy Ulyqbek Esdáýlet, Memlekettik syılyqtyń laýreattary, kórnekti jazýshylar Ánes Saraı, Qajyǵalı Muhambetqalıuly, Qazaqstan Jazýshylar odaǵy basqarma tóraǵasynyń orynbasary Mereke Qulkenov, Memlekettik syılyqtyń laýreaty Aqushtap Baqtygereeva, belgili aqyn Svetqalı Nurjan, fılologııa ǵylymdarynyń doktorlary Amantaı Shárip, Ońaıgúl Turjan, Janat Áskerbekqyzy qatysyp, mándi de maǵynaly sóz qozǵaldy.
– Orys aqyny Gavrııl Derjavınniń «Aqyndar óziniń týǵan jerine uqsap turady» degen tujyrymy bar eken. Dál osy oıdy aýstrııalyq asqan talant ıesi Stefan Sveıg: «Tabıǵat qaı jerde adamdarǵa jaıly bolsa, sol jerde ıdıllııalyq poezııa ómirge keledi» dep naqtylaı túsipti. Al aqyn tabıǵaty qatal, ótken tarıhy odan da qatal óńirde dúnıege kelse she? Bul ǵulamalar syzǵan formýlaǵa salsaq, Farıza poezııasynyń jalpy sıpaty óziniń týǵan jeriniń tabıǵaty men ótken tarıhynyń sıpattamasynan aýmaı qalǵan. Farıza aqyn poezııasy da óziniń týǵan jeriniń tabıǵatymen minezdes, tektes, óristes», – deıdi belgili ǵalym, aqyn Ońaıgúl Turjan.
Týǵan jerdiń qurmetinen asqan qandaı baqyt bolýy múmkin? Aqyn toıy, poezııa meıramy, sóz merekesi osy qurmetke ábden laıyq Farıza atyn taǵy bir márte asqaqtatty.
ATYRAÝ