О́zenniń egiz saǵasy, arýdyń qos burymy sekildi ejelden erkin jasasyp, jarasqan qazaq pen qyrǵyzdyń baýyrlas dostyq qarym-qatynasy qaı kezde de óziniń ómirsheń ónegesimen qundy. Árdaıym bir-biriniń jaqsylyǵyn súıinshilep, qýanyshyna ortaq bolýǵa asyǵar aıyrqalpaqty aǵaıyn el gazeti «Egemen Qazaqstan»-nyń ǵasyr toıynda da aǵedil peıilin aıamady.
Qazaq baspasóziniń mereıli mejesin kúlli qyrǵyz oqyrmanyna súıinshilegen áriptestik ádemi úrdis mereıtoı qarsańynda jarasymdy jalǵasty.
Qyrǵyz halqynyń «Egemen Qazaqstan»-men dáýirles, bıyl tarıhyna 95 jyl toltyryp otyrǵan kóshbasshy basylymdarynyń biri – «Erkın Too» jáne «Kyrgyz Týýsý» gazetteri aıqarma betin qazaq baspasóziniń mereıtoıyna arnady. Basylym basshysy Darhan Qydyrálimen salıqaly suhbat júrgizip, júz jyldyq jylnama tarıhyn baýyrlas aǵaıynǵa keńinen tanystyrdy. Aqjarma tilek, aǵeden peıilderin joldady.
Sóıtip kezindegi Shoqan Ýálıhanov, Muhtar Áýezov, Shyńǵys Aıtmatovtar salǵan sara jol jańa ǵasyr bıiginde jańasha túlep, etekte eli, tóskeıde maly qosylǵan baýyrlas qos memlekettiń ǵasyrdan ǵasyrǵa jalǵasqan máńgilik dostyǵyn osylaı aıshyqtady.