Táýelsizdik alǵannan keıin basqa zertteý salalaryndaǵy sheshilmegen máseleler sekildi Qazaqstan tarıh ǵylymynyń da oqshaý qalǵan tustary boldy. Keıbir tarıhı oqıǵalar ár eldiń tarıhshylary tarapynan ártúrli túsindirilip, keıde qarama-qaıshy derekterdiń de oryn alyp jatatyndyǵy ǵalymdarǵa tańsyq jaǵdaı emes. Sondyqtan ǵylym jolyna endi qadam basqan jas ǵalymdarǵa sheteldik áriptesteriniń ǵylymı kózqarastarymen, qyzmetterimen tanysyp otyrý kásibı maman retinde qalyptasýyna múmkindikter beredi.
«Rýhanı jańǵyrý» baǵdarlamasyn júzege asyrý maqsatynda Sh.Ýálıhanov atyndaǵy Tarıh jáne etnologııa ınstıtýtynda «Uly dalanyń uly esimderi: jastardy patrıottyq tárbıeleýdiń ǵylymı-teorııalyq jáne zertteý mátinindegi praktıkalyq qyrlary» taqyrybynda ótken jas tarıhshy-ǵalymdardyń VII halyqaralyq ǵylymı-tájirıbelik konferensııasy barysynda osyndaı túıtkildi máseleler talqylandy.
Qazirgi zamanǵy tarıh ǵylymynyń ózekti máselelerin talqylaý, onyń ishinde ǵylymı-zertteýlerdiń tulǵataný baǵytyn damytý, «Uly dalanyń uly esimderi» jobasy boıynsha júzege asqan jobalardyń nátıjelerin kópshilikke taratý, óskeleń urpaqqa patrıottyq jáne adamgershilik tárbıe berýdi maqsat etip otyrǵan is-sharada Jas ǵalymdar keńesiniń tóraǵasy, PhD Tımýr Ápendıev Tuńǵysh Prezıdenti – Elbasy N.Á.Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda Qazaqstandy álemniń damyǵan otyz eliniń qataryna enýdi maqsat etip qoıǵandyǵyn negizge ala otyryp, «Baǵdarlama iske asýy úshin aldymyzda qandaı mindetter tur? Qandaı ózgerister qajet?» degen saýaldarǵa kópshiliktiń nazaryn aýdara kele «Qoǵamnyń saıası jáne ekonomıkalyq damýy, aldymen, qoǵamdyq sananyń jańǵyrýymen tikeleı baılanysty deıtin bolsaq, árbir halyqtyń júrip ótken joly, búgingi damýy, bolashaǵy, dástúri men mádenıeti, ulttyq kody mańyzdy ról atqarady. Demek, bizdiń, ıaǵnı tarıh salasynda zertteýler júrgizip júrgen jas ǵalymdardyń aldynda úlken jaýapkershilik tur. Bizdiń zertteýlerimizdiń ǵylymı sapasy, tarıhı faktilerdi, qubylystardy túsindirip, uǵyndyrýdaǵy ustanymy, sondaı-aq belgili bir tarıhı jaǵdaılarda tujyrymdardy durys qoldana bilýin basshylyqqa alýymyz qajet» dep atap ótti.
Jas ǵalymdar konferensııa materıaldaryn Qazaqstannyń, shetelderdiń kitaphanalaryna, JOO, ǵylymı-zertteý ınstıtýttaryna taratýmen qatar TMD elderi jas ǵalymdarynyń jazǵy mektepterin ótkizý dástúrin jalǵastyrý, sonymen qatar kelesi jyly naýryz aıynda «Tugurul Han On-Han» korporatıvtik qorymen birlese otyryp, Tuǵyryl han, Taıbuǵa han jáne Seıdaq han atyndaǵy jas tarıhshy-ǵalymdarǵa arnalǵan respýblıkalyq baıqaýyn ótkizý sııaqty jas ǵalymdardy yntalandyryp, ǵylymǵa tartýǵa baılanysty keshendi josparlardy talqylady.
Konferensııa barysynda atalǵan ınstıtýttyń ǵylymı qyzmetkeri M.Morıakova jas ǵalymdar tarapynan atqarylǵan jumystarǵa sholý jasap, jobalardyń tanystyrylymyn ótkizse, S.Velent-Sherbach, S.Zıeev, E.Temırov, M.Bývakov, M.Jylgeldınov, O.Alymqojaev, M.Qozybaeva, Q.О́mirbek, M.Shaǵyrbaev, J.Qýanysh, D.Jaılybaev, U.Tóleshova sekildi Belarýs, О́zbekstan, Tájikstan, Qyrǵyzstan elderinen kelgen jáne otandyq ǵalymdar ǵylymnyń ózekti máselelerin talqylap, óz zertteýleri boıynsha baıandama jasady. Sondaı-aq usynylǵan jáne talqylanǵan baıandamalar negizinde konferensııa qatysýshylary qazirgi tarıhı tulǵatanýdyń ózekti máselelerine oraı sheshimderin ortaǵa saldy.
Is-shara aıasynda jas ǵalymdar arasyndaǵy jyl saıyn ótkiziletin Ermuhan Bekmahanov atyndaǵy respýblıkalyq baıqaý qorytyndysy jarııalanyp, jeńimpazdar marapattaldy.
ALMATY