Iri memleket qaıratkeri, qazaqy bilik pen ulttyq bolmys-bitimdi sanasyna jasynan sińirgen zamandasymyz Qyrymbek Eleýuly Kósherbaevtyń «Amal – aýyzbirshilik merekesi» atty maqalasy qalǵyǵan kóńildi sergiterlik, ult sanasyn taǵy bir silkindirerlik dúnıe eken.
Eń bastysy – fılosofııalyq maǵyna-mánisi óte tereń, uqsatýy men ustanýy kelisip jatsa, bizdiń qazaqy memleket qana emes, jyl sanap jylýy azaıyp bara jatqan kúlli adamzatqa úlgi-ónege, rýhanı myzǵymas qubyla etip ustanýǵa bolarlyq uly Naýryzdyń máńgilik, Adamata urpaǵyna ortaq ıdeıalyq mazmunyn, rýhanı ónegesin, adamgershilik qubylanamasyn elimizdiń, ultymyzdyń sanasyna búgingiden góri tereńirek, búgingiden góri juǵymdyraq, búgingiden góri tabıǵı, shynaıyraq sińirý qajettigi óte sátti baıandalǵandyǵy.
Qazaqtyń «ashqan qarny toıynyp, ashylǵan etegi jabylǵanyna» kóp boldy, bul – aqymaqtan ózgeniń bárine aıan nárse, biraq bul adam úshin, ult úshin, memlekettiń basybútin egesine aınalǵan halyq úshin máńgilik jasaýdyń, dili berik, sanasy shyńdalǵan, nebir ótkelderden aman ótip, óz myqtylyǵyn neshe márte dáleldegen elderden quralǵan, qateri mol, synaǵy esepsiz álem ortasyna keshe ǵana engen halyq úshin myqtylar qoǵamynda máńgilik qalýyna umtylýynyń álippesi ǵana. Osylaı oılap, osylaı sezingende ǵana máńgilik el ıdealynan dámetýge bolady. Qazir memleket úshin eń basty nárseniń biri – halyqtyń rýhyn shyńdaý, onyń rýhanı-mádenı bolmysyn ornyqty etip qalyptastyrý. Bizge belgili «Rýhanı jańǵyrý», sonyń quramdas bóligindeı «Uly dalanyń jeti qyry» sońǵy jyldary táp-táýir qolǵa alynyp otyrǵanynyń sebebi – osy.
Atalmysh maqalanyń da túpki maqsat-muraty osyǵan saıady. Naýryz ıdeıasy, ásirese Amal – osy muratqa qyzmet ete alatyn, ult rýhyn ózine tolyq tabystyra alatyn, kúlli halyqtyń sanasyn sergitip, rýhyn shyńdaı alatyn dúnıe. Endigi másele – osyny biliktilikpen halyq sanasyna ornyqtyrý. Al bul op-ońaı nárse emes. Úlken jaýapkershilikti, bilikti qalaıtyn jumys.
Meıirhan AQDÁÝLETULY