Balqash qalasynda turatyn Nıkolaı Savıdovtyń qolynan kelmeıtini joq. On saýsaǵynan óner tamǵan ol ıneniń kózine mıkroskopııalyq músinderdi syıdyrady, adam shashynan shahmat tastarynyń músinin jonady jáne taýyq jumyrtqasynyń syrtyna taǵalardy qaǵady.
Nıkolaı mundaı ónerge bala kezinen qyzyǵýshylyq tanytypty. Talapty jas bárin de ózdiginen úırengen.
– Basynda men kishkentaı taǵalar jasaı bastadym. Birte-birte olardy kishireıte berdim – eki mıllımetr, bir... Árıne, maǵan arnaıy qural-jabdyq kerek boldy, ol kezde túgim de joq edi. Tipti, oqyp alatyn arnaıy kitap ta bolmady. Barlyǵyn qatelese júrip óz tájirıbem arqyly úırenýge týra keldi, – dep syr aqtarady sheber.
Nıkolaı kip-kishkentaı taǵalardy isteýdi úırengennen keıin, jylqy qyly men adamnyń bir tal shashyna jazý jazýmen shuǵyldanǵan.
– Túrli tilderde – qazaq, orys jáne aǵylshyn tilderinde maqal-mátel jaza bastadym. Kitaphanadan kitaptar alyp, naqyl sózder terdim. Munyń barlyǵy jańa jabdyqtardy, boıaýyshtardy talap etti. Bárin de ózimniń isteýime týra keldi, sondaı-aq qolda qandaı materıal bar, solardy paıdalandym, – deıdi ol.
Nıkolaı bir kompozısııany jasaý úshin aılar boıy eńbek etetin kórinedi. Jumys barysynda ol 150-250 ese ulǵaıtatyn mıkroskopty paıdalanady. Sonyń arqasynda sheber mıkroskopııalyq abstraktili músinderdi jasaıdy jáne olardy ıne kózine nemese kóknár dánderine ornalastyrady. Aıta ketetin bir jaıt, Nıkolaı Savıdov otyz jyldan astam shyǵarmashylyq qyzmetinde ónerdegi jańa baǵyt – mıkroabstraksıonızmdi patenttep alǵan.
Sheberdiń qolynan shyqqan tańdaı qaqtyrarlyq dúnıeler Qazaqstannyń Tuńǵysh Prezıdentiniń murajaıynda, Máskeýdiń Ostankınosyndaǵy «Ǵajaıyp alań» baǵdarlamasynyń murajaıynda, sonymen qatar Reseı men Ýkraınanyń, elimizdiń basqa da mýzeılerinde saqtaýly tur.
Qaraǵandy oblysy,
Balqash qalasy