Memlekettik qyzmet muraty – ádildik

Joldaýdyń basym baǵyttary eli­mizdiń ekonomıkalyq ahýalyn qalpyna keltirip, halyqtyń əleýmettik jaǵdaıyn arttyrýǵa, ədiletti basqarý júıesin qa­lyptastyrýǵa arnalǵan.

Halyqtyń áleýmettik turmys-tirshiligin jaqsartý, olardyń quqyqtaryn qorǵaý, zań ústemdigin qamtamasyz etý, jemqorlyqqa qarsy kúresti kúsheıtý týraly Prezıdenttiń bergen tapsyrmalary aldaǵy ýaqytta elimizdiń jańasha damýyna qarqyn beretini anyq.

Joldaýda aıtylǵan negizgi baǵyt­tardyń biri memlekettik basqarýdyń jańa úlgisin qurýǵa qatysty  bolyp otyr. Pandemııa kezinde qashyqtan ju­mys isteý memlekettik apparatty ońtaılandyrýǵa bolatynyn kórsetip berdi. Osyǵan oraı, Joldaýda Memleket basshysy memlekettik qyzmetkerler sanyn qysqartý arqyly memlekettik qyzmet jumysyn jetildirýdi tezdetip qolǵa alýdy tapsyrdy. Bıyl memlekettik qyzmetshiler sanyn 10 paıyzǵa, al 2021 jyly 15 paıyzǵa qysqartý josparlanýda. Muny júzege asyrýda qyzmetterdi sıfrlandyrýdyń tıimdi jaqtary da qoldanylady.

Memlekettik apparatty ońtaı­lan­dyrýdan únemdelgen qarajat qalǵan memlekettik qyzmetshilerdiń jalaqysyn kóterýge baǵyttalady. Osy tusta Mem­leket basshysynyń Joldaýdaǵy «Eńbek­aqysy az memlekettik qyzmettiń qoǵam úshin paıdasynan zııany kóp. Bul məselege jete nazar aýdarmaý keri ketýge, biliktilik pen bastamashyldyqtan aıyrylýǵa, sondaı-aq eń soraqysy, jemqorlyqqa əkep soqtyrady», degen pi­kiri memlekettik qyzmetshiniń báse­kege qabiletti bolýy úshin naryqtyń sura­nysyna saı eńbegin baǵalaýdyń qajet ekenin aıqyn kórsetip tur. Iаǵnı el Pre­zıdenti búgingi kún shyndyǵynyń tamyryn dóp basyp otyr. Bul pikirlerdiń bar­lyǵy bizdiń aldaǵy jumysymyzda eske­riletin bolady. Osy oraıda aıtyl­ǵan məselelerdi sheshý úshin 2021 jyl­ǵy 1 shildeden bastap memlekettik qyzmet­shilerdiń jalaqysy faktorlyq-baldyq shkala negizinde tólenbek. Bul memlekettik qyzmetshilerdiń qulshynysyn arttyryp, jaýapkershiligin nyǵaıta túsedi dep kútilýde.

Joldaýda aıqyn kórsetilgendeı, «Ha­lyq únine qulaq asatyn memleket» – shyn mənisinde, «Ədiletti memleket» qurýǵa baǵyttalǵan ıdeıa. Sondyqtan «mem­lekettik qyzmet qol jetpeıtin ja­byq kastaǵa aınalmaýǵa tıis» dep Pre­zıdent memlekettik qyzmetti qaıta qurý qandaı baǵytta júrý kerektigin naqty belgilep berdi. Barlyq memlekettik or­gandar osy kózqarasty berik ustana oty­­­ryp, aldaǵy ýaqytta jumys jasaýy tıis. Ədildik bolmaǵan jerde qoǵamda ún­destik bolmaıtynyn, halyq senimine ıe bolýdyń múmkin emestigin túsinýimiz qa­jet. Adamdardyń narazylyǵyn týdyratyn da osy ədildiktiń eskerilmeýi. Olaı bolsa, azamattardyń məselesin sheshý­de durys jəne ədil sheshim shyǵarý mem­lekettik qyzmetshiniń basty ustanymy bolýy mańyzdy.

 «Ədildik – qoǵam damýynyń mańyzdy sharty. Ədilettilik – əsirese, el-jurttyń taǵdyryn sheshý úshin asa qajet qasıet», dep Prezıdent atap ótkendeı, ádildikke um­tylý – barlyq qoǵam múshelerine ortaq qundylyq bolýy shart. Túbi adamdy adam etetin basty sıpattardyń biri osy – ədilet. Kezinde Abaı atamyz da adam­dy adamshylyqqa jetkizetin mahabbat pen ədilet ekenin aıtyp ketti emes pe?!. Joldaýda aıtylǵan ózekti pikir «Ja­ýap­ty memleket – jaýapty qoǵam – jaýapty adam» júıesin berik ornatý búgingi kúni ədiletti memleket qurýdyń sharty bolmaq.

Ədildiktiń jaýy jalǵandyq. Jal­ǵan­dyq týraly halqymyz «qyrqyn min­seń de qyr astyrmaıdy...» dep aıtyp ketken ǵoı. Joldaýda aıtylǵan bilimdi bolý, erinbeı eńbek etý, kez kelgen isti kəsibı daǵdy arqyly júzege asyrý, adaldyq, uqyptylyq, tııanaqtylyq adam kapıtalyn qalyptastyrýdaǵy bas­ty qundylyqtarymyz bolýy kerek. Osy qasıetterge toqtala kele, Memleket basshysy: «Bərimiz naǵyz qazaqty dəl osyndaı keıipte kórgimiz keledi. Biz sonda ǵana bəsekege qabiletti memleket, zııatker ult qalyptastyra alamyz», dep qoǵamǵa boı túzep, órkenıetti ult bolý baǵdaryn kórsetip berdi. Ər memlekettik qyzmetker ədildikti tý etip ustansa, qoǵamdaǵy keleńsizdikter sheshiler kún alys emes. Eń bastysy, ədildik bar jerde narazylyq, túsinbestik bolmaıtyny anyq.

Darhan JAZYQBAEV,

Memlekettik qyzmet isteri agenttigi tóraǵasynyń orynbasary