Búgin "Egemen Qazaqstan" gazetinde Tuńǵysh Prezıdent – Elbasy Nursultan Nazarbaevtyń "Abaı amanaty" atty maqalasy jaryq kórdi. Onda ol hakim Abaı ómir súrgen tusta qazaq qoǵamy burynǵy handyq basqarý júıesinen birjolata qol úzgeni jaıynda sóz etedi, dep habarlaıdy Egemen.kz.
"Adamzat órkenıetiniń tarıhy san márte dáleldegendeı, uly tulǵalar kóbine kóneniń kúırep, jańanyń boı kóterip, qoǵamnyń bir sapadan ekinshi sapaǵa aýysar dáýirinde dúnıege keledi. Jaratýshy óz meıiri túsken erekshe jannyń boıyna nurly sıpat darytyp, zamananyń san alýan faktorlary onyń qaıtalanbas dara bolmysyn somdaıdy. Abaı Qunanbaıuly tulǵasy da sondaı aralyq kezeńniń jemisi. Eskiniń sońy men jańanyń basyn jalǵaǵan altyn kópir", delingen Elbasynyń maqalasynda.
Budan soń, ol hakim ómir súrgen tusta qazaq qoǵamy burynǵy handyq basqarý júıesinen birjolata qol úzip, "óz qolynan óz yrqy ketken" aldy bulyńǵyr ýaqytqa tap bolyp, kóshpendilik salttary daǵdarysqa ushyrap, otyryqshylyq órkenıet belgileri entelep ene bastaǵanyn jáne bahadúr alamandyqtyń beti qaıtyp, zamanaýı bilimge bet buratyn kez týǵanyn aıtady.