Ýılıam Shekspırdiń alǵashqy pesalar jınaǵynyń túpnusqa kóshirmesi Christie’s aýksıonynda 10 mıllıon dollarǵa satylyp, ádebı shyǵarmalardyń aýksıondyq baǵasynda álemdik rekord jańartty.
Aǵylshynnyń áıgili aqyny hám dramatýrg Shekspır shyǵarmasynyń jańa rekord ornatqan aýksıony Nıý-Iork qalasynda ótti. 10 mln dollarǵa satylǵan jınaq, ıaǵnı avtordyń «alǵashqy folıanty» – Shekspırdiń qazasynan soń jeti jyldan keıin 1623 jyly jaryq kórgen. Sarapshylardyń pikirinshe, bul – antıkvarıat naryǵynda «shamamen, dáýirde bir ret» bolatyn sırek lot. Al sırek lottyń basty keıipkeri kim deısiz ǵoı? Ol – eski kitaptar kolleksıoneri Stefan Lıoventheıl.
Shekspırdiń dál osy pesalar jınaǵy jaryq kórgen kezde dramatýrgtiń 36 týyndysynyń 18-i alǵash ret basylyp shyqqan. Olardyń qatarynda «Makbet», «Daýyl», «Iýlıı Sezar» syndy shedevr shyǵarmalar bar. Avtordyń «alǵashqy folınatynyń», shamamen 235 kóshirmesi bar ekeni belgili, biraq onyń bári birdeı tolyq emes. Qazirgi ýaqytta tek alty kitap qana jeke menshiktiń qolynda.
Shekspır shyǵarmalarynyń aýksıondaǵy satylymy sońǵy ret 2001 jyly rekord ornatqan bolatyn. Ol kezde pesalar jınaǵynyń kóshirmesi 6 mıllıon dollarǵa satylǵan edi.