Partııanyń kezekten tys sezi qysqa da nusqa ári iskerlik stılde ótti dep sanaımyn. Men partııanyń ataýyn ózgertýdi quptaımyn, sebebi amanat sózi árbir qazaq úshin qasıetti.
Partııa Prezıdenttiń saıasatyn júzege asyrýda jaqsy kómekshi bolatynyna senimdimin. Eń basty másele – geosaıası turaqsyzdyq pen sanksııalyq teketires jaǵdaıynda partııanyń áleýetin memleketimizdiń qaýipsizdigi men onyń azamattarynyń ál-aýqatyn qamtamasyz etýge baǵyttaý.
Sezden buryn buǵan deıin jiberilgen kemshilikterdi joıýǵa jáne jumystyń jańa stılin jasaýǵa baǵyttalǵan baıypty analıtıkalyq jumys júrgizilgeni seziledi. Partııa Tóraǵasynyń sóılegen sózinde bul máseleler naqty aıtyldy. Partııa barlyq reformanyń katalızatoryna aınalýǵa tıis. Bul is boıynsha erekshe mindetter partııanyń Májilistegi jáne máslıhattardaǵy fraksııalaryna júkteledi.
Depýtattar atqarýshy bılikpen tyǵyz qarym-qatynasta bolýǵa, parlamenttik tyńdaýlardy, kóshpeli otyrystardy, azamattarmen kezdesýlerdi keńinen ótkizýi qajet. Sonymen qatar partııanyń árbir múshesin tyńdaý mańyzdy. Osyǵan baılanysty ıdeıalar men usynystar jınalady.
Osy qadamdardyń barlyǵy shamadan tys ortalyqtandyrýdan, bıýrokratııadan, kózboıaýshylyqtan arylýǵa múmkindik beredi dep sanaımyn. Biz alǵash ret partııanyń atqarýshy hatshysy Ashat Oralovtyń sózin tyńdadyq. Menińshe, ol partııa apparatynyń kúndelikti úılesimdi jáne belsendi jumysyn qamtamasyz ete alady.
Sonymen qosa, erteń depýtattyq korpýsqa qosylatyn Saıasat Nurbek este qalarlyqtaı sózder aıtty. Onyń azamattarmen ózara qarym-qatynasta bolý úshin sıfrlandyrýdy belsendi paıdalaný týraly úndeýi maǵan unady. Pandemııa bizge onlaın túrde qarym-qatynas jasaýdy úıretti. Sol sebepti halyqqa jedel saýalnama júrgizý, azamattyq qoǵammen, jergilikti atqarýshy organdarmen qarym-qatynas jasaý úshin ony keńinen paıdalaný kerek.
Aıgúl QUSPAN,
Májilis depýtaty