Memleket basshysy Qasym-Jomart Toqaevtyń «Jańa Qazaqstan: Jańarý men jańǵyrý joly» atty Joldaýy kópshiliktiń kóńilinde júrgen kóptegen máselelerge jaýap berdi. Eń bastysy, ishtegi jáne syrttaǵy túrli táýekelderge boı usynbaı, demokratııalyq reformalar jalǵasyn tabady.
Ulttyq quryltaıdyń qurylatyny, jergilikti ózin ózi basqarýdy kúsheıtý men ákimderdi tańdaý, jańa partııalarǵa jol ashý, adam quqyqtarynyń qorǵalýyn jetildirý sekildi naqty qadamdar iske aspaq. Qasym-Jomart Kemeluly sýperprezıdenttik júıeniń eskirgenin alǵa tarta otyryp óziniń partııaǵa múshe bolmaıtynyn málimdedi jáne quzyretteriniń birtalaıyn Parlamentke berip, onyń áleýetin kúsheıtpek. Sonymen qatar Prezıdenttiń týystaryna memlekettik bılikte nemese ulttyq kompanııalarda, kvazımemlekettik sektorda qyzmet isteýge tyıym salatyn jańa zań qabyldanatyny da quptarlyq is. Budan bylaı Prezıdent týystarynyń memlekettik qyzmet pen ulttyq kompanııalarda jumys isteýine tyıym salynady.
Barsha Alash balasyn erekshe qýantqan jańalyq – kezinde qysqaryp qalǵan Jezqazǵan, Semeı óńirlerine oblys mártebesin berip, olardy jańǵyrtý, sondaı-aq Almaty oblysynyń ákimshilik basqarý júıesin jetildirý úshin ekige bólý. Olarǵa beriletin ataýlardan qazaqy ıis ańqyp tur – tıisinshe Ulytaý, Abaı, Jetisý. Árıne, Prezıdent búgin jasaǵan usynystar men mindetter áldeqaıda keń aýqymda túsinýdi talap etedi. Alaıda qazirdiń ózinde ádiletti qoǵam men el ıgiligin basymdyq retinde alǵan Jańa Qazaqstan tujyrymdamasy iske asyp jatqany kúmán týdyrmas. Prezıdent osy jolǵy Joldaýynda burynnan halyqtyń kókeıinde júrgen máselelerge nazar aýdaryp, olqylyqtardyń aldyn alýǵa tyrysqan. Joldaýda eń aldymen burynnan oıda júrgen máselelerdiń sheshiletini qýantty.
Rasýl JUMALY,
saıasattanýshy