El Prezıdenti Qasym-Jomart Toqaevtyń «Jańa Qazaqstan: Jańarý men jańǵyrý joly» atty Joldaýy halqymyzdyń ál-aýqaty táýeldi barlyq negizgi salalardy qamtyp, qazaqstandyqtardy tolǵandyrǵan kóptegen saýaldarǵa jaýap berdi.
Egemendik jyldary elimizde taǵdyrsheshti birqatar zańnamalyq qujattar qabyldanyp, saıası reformalar júrgizilgeni belgili. Memlekettiligimizdi damytýda olardyń aıtarlyqtaı nátıje bergeni de anyq. Degenmen, Prezıdentimiz atap ótkendeı, zamanaýı talaptarǵa saı kelý úshin Qazaqstan qazirgi jaǵdaımen jáne qoǵamdyq damýmen úılesetin baǵyt tańdaýy qajet. Sol úshin elimizdiń azamattary Joldaýda aıtylǵan mindetterdi oryndaýǵa jumyla kirisýi kerek. Bul órkendeý, jetistik pen turaqtylyqqa qol jetkizý úshin asa mańyzdy.
Memleket basshysy óz Joldaýynda elimizdiń ákimshilik qurylymyn jetildirý máselesin kóterip, Konstıtýsııanyń 30-dan astam babyna ózgerister engiziletinin habarlady. Abaı jáne Ulytaý oblystaryn quryp, Almaty oblysyn bólý týraly usynysy ekonomıkalyq ári pragmatıkalyq maqsattylyqqa negizdelgeni anyq, sondaı-aq Prezıdenttiń saılaý júıesin jetildirý, Ulttyq quryltaı qurý týraly tapsyrmalary memleketimizdi odan ári nyǵaıtýǵa septigin tıgizedi.
«Biz birliktiń bastaýy bolǵan osy dala demokratııasynyń dástúrin jańǵyrtýymyz kerek. Ulttyq qoǵamdyq senim keńesi óz mindetin tabysty atqardy. Endi onyń ornyna quramy jaǵynan aýqymdy Ulttyq quryltaı qurýdy usynamyn. Jańa qurylym Ulttyq keńestiń qyzmetin jalpyhalyqtyq deńgeıde jalǵastyrady. Quryltaı qoǵamdyq dıalogtyń birtutas ınstıtýsıonaldyq modelin qalyptastyrýǵa tıis. Sóıtip, bılik pen halyqtyń arasyndaǵy dánekerge aınalatyn bolady. Qazirgi Qoǵamdyq keńesterdiń bárin óz aınalasyna toptastyrady», dedi Prezıdent.
Saıası júıeni úlken ózgerister kútip tur: endi Memleket basshysynyń ókilettiliginiń bóligi Qazaqstan Respýblıkasynyń Parlamentine ótedi, bul, álbette, memlekette demokratııalandyrýdyń bekı túsýine yqpal etedi.
Qoǵamdy túbegeıli ózgerister tosyp tur. Jańa Qazaqstanda elimizdiń árbir azamaty, ár otbasy jaıly da jarqyn, laıyqty ómir súretinine senemiz. Qazaqstannyń jańa álemde óziniń laıyqty ornyn ıelenip, óz egemendigin saqtaıtynyna jáne mádenı ıgiligin eseleı túsetinine esh kúmán joq.
Ǵalym AHMEDIаROV,
«Astana Opera» teatrynyń dırektory