Qalamger Qaısar Álimniń aǵa-dosy, Qazaqstannyń halyq jazýshysy, Abaı atyndaǵy Memlekettik jáne A.A.Fadeev atyndaǵy memleketaralyq syılyqtarynyń laýreaty Ázilhan Nurshaıyqov týraly uzaq jylǵy hattasýlarynyń negizinde jazǵan kitaby «Mahabbat jyrshysy» degen atpen «Ana tili» baspasynan 2012 jyly jaryq kórgen edi.
Endi osy «Mahabbat jyrshysynyń» ekinshi kitaby jýyrda Almatydaǵy «Mereke» baspasynan memlekettik tapsyryspen basylyp shyqty.
Kórnekti jazýshymen jazysqan hattarda ádebıet, ómir, dáýir, qoǵam jaıynda qyzyqty da tumasy tereń, ǵıbraty mol syrlar shertiledi. Sondaı-aq ataqty qalamgerdiń óz oqyrmandary jaıly jazǵandary da hattardy baıyta túser dáıek bolyp, oı salar ortaq órimin tapqan.
Osyndaı altyn arqaýly hattar legi toptastyrylǵan jınaqtyń bul ekinishi kitabynda da burynǵysynan jeli tartqan baı mazmun shalqarlanyp, eldik máseleler kúltelenip, táýelsizdikti tamyrlandyratyn tolǵaqty paıymdar josalana túsedi.
Kitaptaǵy «Ázilhan Halımadan soń» hıkaıatynda jazýshynyń 54 jyl otasqan aıaýly jarynan keıingi on jyldaı shyǵarmashylyq ómiri shynshyldyqpen baıandalady. Áziz júrektiń mahabbat lúpili qartaıyp, qaıǵy oılaǵan shaǵynda da alǵy kúnderge yntalandyrǵan eresen kúshi esh álsiremeı, qaıta jalyndaı túskenine kýá bolasyz.
Sondaı-aq mundaǵy «Ázilhan – kúndelikterimde» toptamasy da mol rýhanı taǵylymymen súısindiredi.
El ishinde «Mahabbat marshaly» atanǵan qadirmendi qalamgerden bul yqylasty sózdiń ózine qalaı tańylǵanyn suraǵan avtorǵa Áz-aǵa: «Mahabbat, qyzyq mol jyldar» romanym ǵoı, osylaısha meni súıispenshilik sezimge baldaı batyryp, dáýrendetip júrgen!» – depti jany araılanyp, jasqa tán jalynǵa sharpylǵandaı bop. Osy júrek sóziniń dáleldi aıǵaqtarymen de kitaptan molynan qaýyshasyz.
Halyqtyq qalamger Á.Nurshaıyqovtyń 100 jyldyq mereıtoıyna oraılastyrylǵan bul kitaptyń jalpaq oqyrmannyń talǵamynan shyǵaryna, rýhanı óristi bolaryna senimdimiz.
«Egemen-aqparat»