«Ádiletti Qazaqstan – Adal azamat» Ulttyq quryltaıynyń ekinshi otyrysynda Qasym-Jomart Toqaev osynaý tarıhı damý kezeńindegi ıdeologııalyq jumystardyń negizgi baǵyttaryn atap kórsetti.
Memleket basshysy mádenı murany saqtaý men nasıhattaý, óskeleń urpaqty tárbıeleý máselelerine keńinen toqtaldy. Ulttyq ıdeologııany qalyptastyrýdyń tıimdi quralynyń biri – kitap shyǵarý isimen tyǵyz baılanysty ekenin basa aıtty.
Bizde basqa elderdiń sheteldik ónimderi basym – ádebı kitaptardyń 90 paıyzǵa jýyǵy syrttan keledi. Bul úrdistiń saldary qandaı bolatyny aıtpasa da túsinikti. Prezıdent: «Ulttyq múddege saı keletin kitaptardy kóptep basyp shyǵarý óte mańyzdy. Smartfon balanyń qolyndaǵy kitaptyń ornyn baspaýy qajet», dep atap kórsetti. Memleket basshysynyń aıtýynsha, búginde elimizdiń mektep kitaphanalarynda 130 mln kitap bar. Alaıda olardyń arasynda kórkem ádebıettiń úlesi shamaly.
Prezıdenttiń «kitap oqıtyn halyq qana naǵyz zııaly bola alady» degen pikirine tolyq qosylamyn. Sondyqtan óskeleń urpaqtyń kitap oqýǵa degen qyzyǵýshylyǵyn oıatýǵa bar kúsh-jigerimizdi salamyz.
Jazýshylar odaǵy «Balalar kitaphanasy» jańa baǵdarlamasyn júzege asyrýǵa úles qosýǵa ázir. Qazaq ádebıetiniń túrli kezeńi men janryn qamtıtyn kitaptardyń arnaıy tizimin jasaýǵa belsene atsalysýǵa daıynbyz.
Memleket basshysynyń táýlik boıy jumys isteıtin prezıdenttik kitaphanany salý týraly usynysy da jazýshylar qaýymynan qoldaý tapty. Bul kitaptardy qoljetimdi etedi jáne qoǵamda kitap oqýǵa degen qyzyǵýshylyqty oıatýǵa kómektesedi. El Prezıdenti Qazaqstan Jazýshylar odaǵynyń ulttyq ıdeologııa men jańa qoǵamdyq etıkany qalyptastyrý, sonyń ishinde kitap oqıtyn ultty damytý sııaqty mańyzdy isterge belsene atsalysýy keregine nazar aýdardy.
Bul máselelerde biz Memleket basshysymen tolyq yntymaqtasamyz. Qazaq ádebıetiniń damýyna udaıy qoldaý kórsetip júrgeni úshin odaq atynan, jeke óz atymnan alǵys aıtamyn. Zamanaýı avtorlardyń shyǵarmalary suranysqa ıe bolýy kerek, sórege shań jınamaýǵa tıis. Bul másele boıynsha da jumys isteıtin bolamyz.
Sondaı-aq Memleket basshysy oqyrmandardy rýhanı azyq bere alatyn tyń týyndylar kútip turǵanyn qadap aıtty. «Qazaqstannyń halyq jazýshysy» ataǵynyń qaıtarylýy Jazýshylar odaǵynyń jumysyna jańa serpin beretinine senimdimin. Bul joǵary baǵa ózekti, qyzyqty, tanymal týyndylar jasaǵan avtorlarǵa ǵana beriledi.
Prezıdent usynǵan bastamalar – qoǵamnyń barlyq kúshi jumyldyrylýǵa tıis úlken jumystyń bir parasy ǵana. Shyǵarmashylyq zııaly qaýym, jazýshy qaýym ókilderi bolyp jatqan tarıhı ózgeristerden shet qalmaýy kerek. Biz Ádiletti Qazaqstandy qurýǵa qatysý isindegi joǵary jaýapkershilikti túsinemiz.
Jazýshylar odaǵy jańa qoǵamdyq ádep pen jańa damý paradıgmasyn qalyptastyrý máselelerin sheshýge belsene atsalysady.
Mereke QULKENOV,
Qazaqstan Jazýshylar odaǵynyń basqarma tóraǵasy