Bıyl artyna mol mura qaldyrǵan aqyn Murat Móńkeulynyń týǵanyna 180 jyl toldy. Zar zamannyń ókili jeti jasynan jetimdiktiń zardabyn kórgen. Aýyl moldasynan arabsha saýat ashqan ol aqyndyq ónerimen tanymal bolǵan.
Jaqynda Atyraýda aqyn ári jyraýdyń shyǵarmashylyǵyna arnalǵan jyrshy-termeshilerdiń aımaqtyq baıqaýy ótti. Oǵan Aqtóbe, Mańǵystaý jáne Atyraý oblystarynyń ónerpazdary qatysty. Oblystyq mádenıet jáne tilderdi damytý basqarmasy uıymdastyrǵan baıqaý birneshe maqsatty kózdedi.
«Aımaqtyq baıqaý, birinshiden, Murat Móńkeulynyń shyǵarmashylyǵyn jańǵyrtý, ekinshiden, daryndy jastardyń oryndaýshylyq sheberligin shyńdaý, úshinshiden, jas urpaqty ultjandylyqqa tárbıeleý maqsatynda ótkizildi. Atadan balaǵa mıras bolǵan saf altyndaı terme ónerine jańa serpin berýdi uıǵardyq», dedi oblystyq halyq shyǵarmashylyǵy ortalyǵynyń basshysy Jánibek Amanııazov.
Baıqaýǵa qatysýshylar eki kezeńde baq synady. Aldymen aqynnyń jyryn, al ekinshi kezeńde terme men tolǵaýlardy oryndady.
Máselen, aqtóbelik ónerpaz Janerke Quttyǵaı dombyrany jeti jasynan serik etken. Bastapqyda halqymyzdyń dástúrli ánderin oryndap júrgen. Keıin jyrshylyq baǵytqa den qoıǵan. «Maǵan bul baǵyt óte unaıdy. Terme – mazmuny jaǵynan tereń, tárbıelik sıpaty bar 3-4 mınýttyq shyǵarma. Tolǵaý – 10 jáne odan da kóp mınýtqa sozylatyn týyndy. Al jyr oryndaý jarty saǵattan alty saǵatqa deıin sozylýy múmkin. Ázirge jarty saǵattyq shyǵarmalardy oryndap júrmin. Shyǵarmashylyqtyń bul janry patrıottyq sezimdi, Otanǵa degen súıispenshilikti oıatady. Ult batyrlarynyń erligi baıandalatyn jyr kóp. Árıne, eki jastyń arasyndaǵy mahabbatty jyrlaıtyn týyndylar da bar. Jyr-termelerdi oryndap, sózdik qorymdy baıyttym», deıdi Janerke Quttyǵaı.
Onyń aıtýynsha, Aqtóbede jyr-terme mektebi ashylǵan. Qazir ulttyq ónerdi dáripteıtin mektepte qazaq ulandary kóp. Olarmen birge orystyń úsh balasy dáris alady.
Qazylar alqasy ár qatysýshynyń oryndaýshylyq sheberligine bas mán berdi. Saıys qorytyndysymen Mańǵystaý oblysynan qatysqan Berdibaı Toıǵulıev bas júldeni ıelendi. Birinshi oryn Atyraý qalasynyń týmasy Arýjan Erimovaǵa, ekinshi júlde Aqtóbe qalasynan kelgen ónerpaz Dılnaz Qýanyshqa berildi. Al Janerke Quttyǵaı úshinshi júldege laıyq dep tanyldy.
Atyraý oblysy