Memleket basshysy Qasym-Jomart Toqaev Joldaýynda respýblıkalyq bıýdjettiń kiris bóligi oryndalmaı jatqanyna toqtalyp, bólingen qarajatty tıimdi paıdalaný men onyń shyǵys bóligin qatań baqylaýda ustaý qajet ekenin aıtqan bolatyn.
Prezıdenttiń júktegen tapsyrmasyn iske asyrý maqsatynda Qarjy mınıstrligi salyq baǵyty men kedendik retteýde, bıýdjetti josparlaý men aýdıt isinde sıfrly bastamalardy josparly túrde iske asyryp jatyr.
Aıtalyq, bizdiń salaǵa qarasty Elektrondy qarjy ortalyǵynyń súıemeldeýimen elimizdiń qarjy júıesin sıfrly transformasııalaý baǵytynda birneshe tyń joba qolǵa alynyp, júzege asyrylyp keledi. Sonyń biri – onlaın bıýdjettik monıtorıng. Bıýdjet qarajatynyń jumsalýyn baqylaýdy kúsheıtý maqsatynda aýdıtorlar josparlaýdan bastap bıýdjettiń onlaın rejimde atqarylýyna deıingi bıýdjettik monıtorıng boıynsha jumysty atqaryp jatyr. Buǵan Qarjy mınıstrliginiń túrli aqparattyq júıeleriniń derekterin paıdalaný arqyly qol jetkizildi.
Joba bıýdjettiń sáıkessizdigine baılanysty táýekelderdi ýaqtyly anyqtap, habar berýge jáne táýekel profılderin jasaýǵa baǵyttalǵan. Bul joba táýekelder beıini boıynsha kameraldy baqylaý jasap, bıýdjetti josparlaý jáne atqarý kezinde syn-qaterge jedel den qoıýǵa, bıýdjet qarajatyn tıimsiz ıgerilý táýekelderiniń aldyn alýǵa, sondaı-aq qarjylyq buzýshylyqtardy azaıtý men memlekettik shyǵystardy baqylaýǵa septigin tıgizedi.
Al memlekettik josparlaýdyń aqparattyq júıesi bıýdjettik josparlaýdy avtomattandyryp, aqparattyq qoldaýǵa yqpal etedi. Onyń bıýdjet qarajatyn tıimdi bólý boıynsha artyqshylyǵy kóp. Taǵy bir keremet joba – Biryńǵaı satyp alý platformasy. Ol paıdalanýshylardyń qolaılylyǵy úshin monıtorıng pen baqylaýdy qamtamasyz ete otyryp, memlekettik organdardyń, kvazımemlekettik sektor sýbektileriniń, basqa da alańdardyń satyp alý úderisterin biriktire alatyn múmkindikke ıe. Sol sekildi taýarlardyń elektrondy katalogi – tehnıkalyq sıpattamalardy avtomatty túrde qalyptastyryp, tarıhı baǵalardy taldaýǵa jáne taýar aınalymyn baqylaýǵa múmkindik beretin derekterdi saqtap, basqarýǵa arnalǵan ónim. Tizbekteı bersek, adamǵa baǵdarlanǵan jobalarymyz barshylyq. Olar óz jemisin aldaǵy ýaqytta beredi dep senemiz.
Áset TURYSOV,
Qarjy vıse-mınıstri