Iаsaýı fenomeni – tutas túrki jurtyna yqpal etken biregeı qubylys. Ańyz áýlıe áli kúnge jan-jaqty zerdelenip, jańa qyrynan ashylyp keledi.
Qoja Ahmet Iаsaýıdiń «Dıýanı hıkmet», «Paqyrnama», «Mıratýl-qýlýb», «Dar-rısalaı adabýt-tarıqat» atty eńbekteri kópke málim. Jaqynda M.Áýezov atyndaǵy Ádebıet jáne óner ınstıtýtynyń ǵylymı qyzmetkeri, PhD doktoranty Baýyrjan Myrzaquldyń zertteýi nátıjesinde áýlıe aqynnyń «Qudiretnama» atty qoljazbasy tabylyp otyr.
«Qudiretnama» shyǵarmasymen 2024 jyldyń basynda Tashkentke barǵan ǵylymı issaparymyzda tanysqan edik. Sonda Qoja Ahmet Iаsaýı týraly eki eńbek qolymyzǵa tústi. Birinshisi «Rısolaı Sýlton Hoja Ahmad» shyǵarmasy bolsa, ekinshisi – biz toqtalyp otyrǵan «Qudiretnama» eńbegi. «Qudiretnamanyń» túpnusqasy Ábý Raıhan Bırýnı atyndaǵy Shyǵystaný ınstıtýtynyń sırek qorynda saqtalǵan», deıdi jas ǵalym Baýyrjan Myrzaqul.
«Qudiretnama» shyǵarmasy – dúnıeniń ótkinshi qyzyq hám ómirdiń fánıligi haqyndaǵy týyndy. Aqyn: «Miskin Ahmet, kel endi, táýbe qylyp jolǵa kir», dep ózin-ózi qamshylasa, ıgi jaqsylardy súıinshilep, «Táýbe qylǵan pendesin jánnatta sultan etpekshi» dep jyrlaıdy.