Saýd Arabııasynnyń Er-Rııad qalasynda álemdegi eń iri avtomattandyrylǵan metro iske qosyldy.
Metro 5 jeliden turady. Uzyndyǵy 176 shaqyrym. Qazirgi kezde úsh jeli jumys istep tur. Al qalǵandary kelesi jyldyń qańtar aıynda ashylady dep josparlanǵan. Metro kúnine 3,6 mıllıon jolaýshyny tasymaldaı alady. Sonyń arqasynda jeńil kólik qozǵalysy sırep, kómirqyshqyl gazynyń shyǵarylýy jylyna 12,5 mıllıon tonnaǵa azaıady degen úmit bar. Vagondar otbasylarǵa, jeke jolaýshylarǵa, múmkindigi shekteýli adamdarǵa dep úsh sanatqa bólingen. Avtomattandyrylǵan júıe poıyzdardyń qaýipsizdigi men birqalypty qozǵalysyn qamtamasyz etedi.
Kýrerlerge arnalǵan kózildirik
«Amazon» kýrerlerge arnalǵan «aqyldy kózildirik» jasap jatyr.
«Amelia» dep atalatyn qurylǵy dittegen mekenjaıǵa aparatyn joldy kórsetip, sálemdeme jetkizý jumysyn jeńildetedi. Sondaı-aq kózildirik ǵımaratqa kirgennen keıin úıdi adaspaı tabýǵa kómektesip, sońyna deıin baǵdar beredi. Sálemdemeniń jetkenin rastaý úshin kózáınekke beınebaqylaý júıesi ornatylady. «Amazon» kompanııasynyń dereginshe, «Hands-free» tehnologııasy arqyly jumysty ońtaılandyryp, fızıkalyq júktemeni azaıtý da josparda bar. Joba 2026 jylǵa qaraı tolyq iske asady.
Poıyzdaǵy 5G
Qytaı zertteýshileri vakýýmdyq poıyzdarda turaqty baılanysty qamtamasyz etetin tehnologııa ázirledi.
Vakýýmdyq poıyzdar saǵatyna 1000 shaqyrym jyldamdyqpen qozǵalady. Ol magnıt levıtasııasynyń arqasynda ushaqtan da tez júredi. Bul jobany eń alǵash Ilon Mask usynǵan bolatyn. Alaıda ol áli iske asqan joq. Qytaılar onyń aldyn orap, «Hyperloop» jelisi 2035 jyly iske qosylatynyn málimdedi. Tipti olar poıyzdy ınternetpen qamtamasyz etetin tehnologııa da jasap shyqqan. Baılanysty turaqty ustaý úshin zertteýshiler qubyrdyń ishine eki parallel kábil júrgizýdi usynyp otyr. Kábilder sıgnal taratyp, ınternetpen turaqty qamtamasyz etedi.