Shalkıiz jyraýdyń «ádil tóre el bastar» degen sózi bar. Jyraýlar poezııasynda keńinen nasıhattalǵan bul uǵymdar keıin Abaı, Shákárim eńbekterine ulasty. «Adal júrip, adal tur, schetiń týra kelýge» degende Abaı qoǵam men Qudaı aldyndaǵy esepti qosa aıtqanǵa uqsaıdy. Adamdyq qasıettiń negizi sanalatyn osy adaldyq uǵymyn Memleket basshysy Qasym-Jomart Toqaev Ulttyq quryltaıdyń basty ustyny etkeni tegin deısiz be? Bizdiń halyqtyń sonaý túp-tanymynan kele jatqan qasıetter negizinde «Adal adam – Adal eńbek – Adal tabys» atty tujyrymdama usynyp, jasampazdyq jáne jańashyldyq basty qundylyqtarymyzdyń biri ekenin atap kórsetti. Prezıdenttiń aıtýynsha, bul qundylyqtardy basty nazarda ustaý búgingi ózgermeli álemde ultymyzdyń mereıin ósirip, jahandyq básekege qabiletti bolýymyzǵa múmkindik beredi.
Shyn máninde, aldyńǵy qatarly memleketter qatarynan berik oryn alýymyz úshin birinshi kezekte azamattarymyzdyń jańasha oılaı bilýge, ýaqyt talabyna saı jasampazdyqqa umtylǵany abzal. Bul oraıda, basqasyn aıtpaǵanda, bilim men ǵylym, mádenıet, rýhanııat salalaryn damytý maqsatynda kúsh biriktirý óz jemisin beredi. Sondyqtan, adamı kapıtalǵa ıek artyp, eńbekqor, talantty azamattardy barynsha qoldaý, olardyń áleýetin tıimdi paıdalaný mańyzdy. Osy tusta batyl sheshim qabyldaı biletin, ozyq, tyń amal-tásilderdi qoldana otyryp qoǵam damýyna oń áserin tıgizip, paıda keltirip júrgen otandastarymyzdy kópke úlgi etý, sol arqyly adal da belsendi azamattarymyzdyń qataryn kóbeıtý qajet. Bul sanattaǵy adamdardyń úni qoǵamdaǵy keritartpa, bardy joq dep zarlaıtyn, atqarylǵan ıgi isterden kemshilik izdep baıbalam salatyn keıbireýlerdiń aıqaıynyń astynda qumyǵyp qalmaýǵa tıis.
Sońǵy kezderi elimizde kreatıvti ındýstrııany damytý, ony zaman suranysyna saı ilgeriletý isi jandanyp keledi. Buǵan dálel retinde qoǵamymyzdyń mádenı-rýhanı ómirin jandandyryp, onyń boıyna qan júgirtip, óz elimizdiń aýqymynan shyǵyp, álemdik deńgeıde tanyla bastaǵan otandastarymyzdyń tabystaryn aıtýymyzǵa bolady. Kıno, mýzyka, ádebıet, sondaı-aq ónerdiń basqa da baǵyttary boıynsha elimizdiń jasampazdyq áleýetin, is-qımylyn álemdik keńistikke tanytyp júrgen órenderimiz bizdiń árdaıym maqtanyshymyz bola bermek.
Búgingi jas tolqynnyń áleýeti, qabileti, adal nıeti bolashaqqa degen senimimizdi arttyryp otyr. Jasampaz iske umtylǵan jastarymyzdyń búgingi qadamy, qarymy elimizdi damýdyń dańǵyl jolyna túsirip, odan ári ilgerileı berýimizge tolyq múmkindik beretindeı.
Qazirgi tańda ultymyzdyń jańa sapasyn qalyptastyrý, jańǵyrǵan, jańashyl qoǵam qurý mindeti kún tártibinde tur. Osy máselede tabysqa jetý, tıimdi jolǵa túsýde «Adal azamat» uǵymyna ekpin túsirmeı bolmaıdy. Eldik, ulttyq máselelerde batyl qımyldaý, sheshimtal bolý ózekti. Al batyl is-qımyl, sheshimtaldyq tek adal azamattarǵa tán. Olaı bolsa, Ádiletti Qazaqstan ıdeıasymen tolyq úndesetin «Adal azamat» uǵymyn basty qundylyqtarymyzdyń biregeıi retinde urpaq sanasyna sińirý óte ózekti.
Qazirgi tańda qazaq qoǵamyna syrtqy kúshterdiń teris áserleri az tıip otyrǵan joq. Onyń keri saldarlaryn sezinip te otyrmyz. Sodan kelip ishki ýaıymymyz da, alańdaýshylyǵymyz da bir basymyzǵa jeterlik. Basqasyn aıtpaǵanda, jastarymyzdyń, tipti orta býynnyń edáýir bóligi syrtqy yqpaldy taraptardyń «jumsaq kúshine» aınalyp barady. Birimiz japon, birimiz koreı, birimiz aǵylshyn, taǵy birimiz basqa bolǵymyz keledi. Mundaılar ómir súrý saltyn, tanym-túsinigin, júris-turysyn, iship-jemin álgi ózi eliktep-solyqtaıtyn ult ókilderinikine beıimdep áýre. Bul shyndap kelgende ózin súıkimdi kórsetip, sonyń arqasynda qoǵamymyzǵa saıası-ekonomıkalyq, mádenı-rýhanı yqpalyn júrgizip, ózderi úshin tıimdi naryq, arzan da anaıy keńistik qurýdy kózdeıtin syrtqy kúshterdiń nátıjeli jumystarynyń kórinisi. Olar osy maqsattaryn júzege asyrý úshin bizdiń jastarymyzdy óz dárgeıine ıildirip, qolbala qylyp alýǵa kiriskendeı. Olarǵa alystan kúsh tartpaı-aq balalarymyzdy, óz adamdarymyzdy ózimizge qarsy kúsh retinde qoldanǵan tıimdi.
Mine, osyndaı úderister júrip jatqan qazirgi kezeńde el Prezıdenti usynǵan Ádiletti Qazaqstan ıdeıasymen úndesetin «Adal azamat» uǵymyna nazar aýdarýdyń qanshalyqty mańyzdy ekenin aıtqymyz keledi. О́ıtkeni adal adam qashanda óz eliniń, óz halqynyń túpki múddesin júregimen túsine alady, sonyń arqasynda ózgeniń yqpalynda qalyp qoıýǵa, basqanyń shotyn shabýǵa ary, adaldyǵy jibermeıdi.
Sondyqtan da ózimiz qalaǵan jasampazdyq, jańashyldyq jolyna túsip, onyń talaptaryn jaýapkershilikpen oryndaı bilsek qana mártebemiz bıik, juldyzymyz joǵary bolmaq.