El Prezıdentiniń «Qazaqstan jańǵyrýdyń jańa kezeńine qadam basty» atty suhbaty el damýynyń qazirgi ahýalyn ǵana emes, onyń uzaqmerzimdi strategııalyq baǵytyn aıqyndaıtyn salmaqty saıası-pýblısıstıkalyq oı-tolǵaý retinde baǵalanýǵa tıis. Prezıdent bul suhbatta ekonomıkalyq ósim, áleýmettik saıasat, memlekettik basqarý, rýhanı qundylyqtar, tarıhı sana jáne zamanaýı tehnologııalar máselelerin birtutas júıede qarastyrady.
Suhbattyń negizgi ózegin Qazaqstannyń sapalyq jańǵyrý kezeńine ótýi týraly tujyrym quraıdy. Memleket basshysy qazirgi damý úderisin jekelegen kórsetkishtermen shektemeı, qurylymdyq ózgeristerge negizdelgen uzaqmerzimdi jol retinde sıpattaıdy. Prezıdenttiń aıtýynsha, ekonomıkalyq ósim halyqtyń ómir sapasyn arttyrýǵa qyzmet etýge tıis. Osy turǵyda ınflıasııa, baǵa turaqtylyǵy, halyqtyń satyp alý qabileti máselelerine erekshe nazar aýdarylady. Bul Memleket basshysynyń áleýmettik jaýapkershilikke negizdelgen pragmatıkalyq ustanymyn aıqyn kórsetedi.
Suhbatta aqparattyq saıasat pen qoǵamdyq sana máselesine de aıryqsha mán beriledi. Memleket basshysy dástúrli baspasózdiń qoǵamdaǵy rólin joǵary baǵalap, sapaly, tereń taldaýǵa negizdelgen jýrnalıstıkanyń mańyzyn atap ótedi. Prezıdent áleýmettik jelilerdegi ústirt ári emosııaǵa qurylǵan aqparattyń kóbeıgenin synǵa alyp, sanaly qoǵam qalyptastyrý úshin jaýapty aqparat keńistigi qajet ekenin aıqyn jetkizedi.
Osy arnada Memleket basshysy tarıhı sana máselesine arnaıy toqtalady. Prezıdent kez kelgen eldiń, sonyń ishinde Qazaqstannyń da tól tarıhy qaıshylyqqa toly ekenin atap ótip, tarıhı derekterdi burmalaý men naqty qujattarmen dáleldenbegen tulǵalardy shamadan tys ulyqtaýdy aqylǵa qonbaıtyn qubylys retinde baǵalaıdy. Keıingi jyldary tarıhty talqylaýdyń sánge aınalýy – halyqtyń ótkenge degen qyzyǵýshylyǵyn kórsetetin quptarlyq úrdis. Alaıda Memleket basshysy bul qyzyǵýshylyqtyń ǵylymı dáldikpen jáne jaýapkershilikpen ushtaspaı otyrǵanyna alańdaýshylyq bildiredi. Oıdan shyǵarylǵan derekter men jalǵan batyrlardy dáripteý qoǵamdy adastyryp, tarıhı aqıqattan alystatatyny qatań eskertiledi.
Prezıdenttiń paıymynsha, tarıh qoǵamdy daýlastyratyn emes, kerisinshe, uıystyratyn qundylyqqa aınalýǵa tıis. Bolashaqqa umtylǵan birtutas ult retinde biz ótkenimizdi jasandylyqsyz, qaz-qalpynda qabyldaýǵa tıispiz. Aqıqatqa negizdelgen tarıhı tanym ǵana ótkennen taǵylym alyp, kemshilikterdi túzetýge jáne bolashaqqa senimmen qadam basýǵa múmkindik beredi.
Osy tarıhı-rýhanı ustanym Memleket basshysynyń Abaı Qunanbaıuly murasyn júıeli túrde dáripteý saıasatymen tikeleı sabaqtas. Prezıdent Abaıdy qoǵamdaǵy kemshilikterdi búkpesiz aıtyp, ultty «Tolyq adam» bolýǵa bastaıtyn oıshyl retinde baǵalaıdy. Uly aqynnyń «Qara sózderi» eńbekqorlyqqa, bilimge, adamgershilikke úndeıtin qundylyqtary búginde de ózektiligin joǵaltqan joq. Memleket basshysynyń pikirinshe, mán-maǵynasyz pikirtalastar men negizsiz sózderden góri, Abaı ilimi urpaqqa naqty rýhanı baǵdar beredi.
Suhbatta qozǵalǵan taǵy bir mańyzdy baǵyt – zamanaýı tehnologııalar men jasandy ıntellekt máselesi. Prezıdent sıfrlyq damý men tehnologııalyq ilgerileýdi eldiń básekege qabilettiligin arttyratyn strategııalyq faktor retinde baǵalaı otyryp, olardyń adamgershilikpen jáne ulttyq qundylyqtarmen úılesýi qajettigin atap ótedi. Bul turǵyda Abaıdyń «aqyl, qaırat, júrek» qaǵıdasy qazirgi zamanǵa beıimdelgen rýhanı baǵdar retinde usynylady.
Qorytyndylaı kele, Memleket basshysynyń bul suhbaty elimizdiń jańǵyrý jolyndaǵy keshendi kózqarasyn aıqyn kórsetedi. Prezıdent ekonomıkalyq ósimdi áleýmettik ádilettilikpen, tarıhı aqıqatty rýhanı jaýapkershilikpen, tehnologııalyq damýdy adamı qundylyqtarmen sabaqtastyra otyryp, sanaly ári básekege qabiletti ult qalyptastyrýdy basty maqsat retinde belgileıdi. Bul suhbat – eldiń bolashaǵyna baǵyttalǵan parasatty, júıeli jáne jaýapty memlekettik saıasattyń aıqyn kórinisi.
Kenjehan MATYJANOV,
M.Áýezov atyndaǵy Ádebıet jáne óner ınstıtýtynyń bas dırektory, akademık