Ulttyq quryltaıdyń V otyrysynda qabyldanǵan sheshimder el damýyna aıtarlyqtaı áser etedi. Saıası júıedegi bul ózgerister memlekettik basqarýda laýazym ıeleriniń taǵdyryn halyqtyń únimen, pikirimen baılanystyratyn tetikke aınalmaq. Parlamenttiń endigi jerde «Quryltaı» dep atalýynyń ózi ulttyq erekshelikten bólek, saılanǵan azamatqa jaýapkershilik júkteıdi degen senimdemin.
Al Vıse-prezıdent laýazymy saıası júıeniń turaqtylyǵyna úles qosary sózsiz. Mysaly, kezinde Prezıdent Ákimshiliginiń jetekshisi retinde memlekettik hatshylarmen, memlekettik keńesshilermen jumys istedim. Bul joǵary laýazym bolǵanymen, ókilettilikteri konstıtýsııada tolyq anyqtalmaǵandyqtan, bul oryndar soǵan kelgen adamnyń beıimdiligine qaraı belgili bir fýnksııalarmen tolyqtyrylyp otyrdy. Keıde tipti olardyń memlekettik apparattyń ishindegi naqty orny aıqyn bolmaı júrdi. Al Vıse-prezıdent ataýynyń ózi kórsetip turǵandaı jaýapkershiligi de, ókilettiligi de óte joǵary laýazym. Bul ózgeristerdiń bári saıası júıe ornyqtylyǵyn qamtamasyz etedi.
Erekshe bir nazar aýdaratyn taǵy bir másele – konstıtýsııalyq komıssııa qurý bastamasy. Komıssııa ózgeristerdi tereń taldap, halyqtyń pikirin eskere otyryp, konstıtýsııanyń jańa jobasyn ázirleıdi. Buny «Halyq únine qulaq asatyn memleket» qaǵıdatynyń bizdiń konstıtýsııalyq reformadaǵy kórinisi deýge bolady.
Álıhan BAIMENOV,
memleket jáne qoǵam qaıratkeri