Bilim oshaǵyna jazýshynyń esimi 2017 jyly berilgen bolatyn. Sol kúnnen bastap myńnan astam oqýshy bilim alyp jatqan mektep ujymy qalamgerdiń murasyn jańǵyrtyp, jan-jaqty nasıhattaý maqsatynda júıeli jumys istedi.
Mýzeıdiń ashylý saltanatynda oblys ákiminiń orynbasary Aına Mysyrálimova, jazýshy-dramatýrg Jabal Erǵalıev, zamanynda Sáken serimen kórshi turǵan el aǵasy Meıram Ǵıbadılovtar seriden qalǵan sóz jas urpaqty tárbıeleýge úlken yqpalyn tıgizetindigine aıryqsha toqtaldy.
– Bul ıgi qadamnyń jas urpaqqa tıgizer paıdasy óte zor. Jazýshynyń júrdek qalamynan týyndaǵan rýhanı baı murany zerdelep oqyp, kórkem sózdiń qudiretin uǵatyn bolady. Qazir bizde «Sákentaný» fakýltatıvi júrgiziledi. Aldaǵy ýaqytta «Sáken oqýlary» baıqaýyn uıymdastyrmaqpyz, – deıdi mektep dırektory Baıan Sársembaeva.
Imandy sharýanyń ońynan sabaqtalýyna oblystyq mádenıet basqarmasy men Málik Ǵabdýllın mýzeıiniń ujymy mol úles qosqandyǵyn da aıta ketýimiz kerek. Mýzeı dırektory Qudaıberli Myrzabek bastaǵan ujym mol eńbek sińiripti. Málik Ǵabdýllın mýzeıine jańǵyrtý jumystary júrgizilgende, sál eskirgen buıymdardy laqtyryp tastamaı, paıdalaný qajettigi týraly oı týyndasa kerek. Osyndaı uqyptylyqtyń arqasynda 2019 jyly qala irgesindegi Krasnoıar aýylynda halyq aqyny Kóken Shákeev mýzeıi ashylsa, búgingi kúni bilim oshaǵynyń qasynda qabyrǵaly qalamgerge arnalǵan mýzeı uıymdastyrylyp otyr.
Bardy uqsata bilýdiń bir belgisi osy shyǵar. Ashylý saltanatynda «Japandaǵy jalǵyz úı» romany boıynsha áserli monolog oqylyp, «Zamanaı» kórkem fılminen úzindi kórsetildi. Sáken seriniń segiz qyrly, bir syrly ónerpaz bolǵandyǵyn da jerlesteri jaqsy biledi. Aýdıotaspada saqtalyp qalǵan jazýshynyń óz daýysymen salǵan áni jınalǵan jurttyń júregin shymyrlatty.
Ulttyń rýhanı qundylyǵyna oıyp turyp olja salǵan qalamger murasy jas urpaqpen qaıta qaýyshyp, máńgilik ǵumyry sabaqtaldy. El óz erlerin osylaı ardaqtasa, jarasymdy emes pe?!
Kókshetaý
