«Syıynýshynyń qoly» kartınasy – Dıýrerdiń Mattıas Grıýnevaldpen birlese jazǵan ataqty domınıkandyq monastyr trıptıhine daıyndyq barysynda, ıakı jattyǵý retinde jazǵan dúnıesi. Áıtse de týyndy ózi kútpegen jetistikke jetti. Shabyt ústinde avtor jalbarynǵan adamnyń qoldaryn jáne kartınaǵa jan bitirgen barlyq nobaılardy keremet óner týyndysyna aınaldyrady. Bul onyń óz qoly edi.
Albreht Dıýrer úshin qoldy anatomııalyq dáldikpen beıneleý mańyzdy boldy. Sheber «model» retinde sol qolyn alǵan... Iá, bul onyń sol qoly. Sýrette sheberdiń bir qolyn ǵana tolyq kóremiz, al oń qoly aına arqyly berilgen. Zertteýshilerdiń aıtýynsha, kartınadaǵy keskin Albrehttiń aǵasynyń qoldary bolýy múmkin. Búginde ártúrli boljam aıtylady.
Kartınanyń tolyq nusqasynda qoldardan basqa, úlken paraqta namaz oqyǵan múrıdtiń basy da salynǵan bolatyn. Keıinirek sýret áldebir sebeptermen ekige bólinedi. Avtor óziniń barlyq «jattyǵý syzbalaryn» qandaı da bir paraq túrinde saqtap, keıinnen óńdelgen elementterdi basqa kartınalarda qoldanǵan.
«Syıynýshynyń qoly» – A.Dıýrerdiń shyǵarmashylyǵynyń eń tanymal motıvi. Sýret kóptegen reprodýksııaǵa ıe bolyp qana qoımaı, tipti músindik formada, sondaı-aq shaǵyn relefter túrinde AQSh-ta keń taralǵan.
Sýret kórkemdik qundylyǵymen qatar, duǵa etýdiń, kóńil aıtýdyń jáne jalpy dinı qatynastyń sımvoly retinde úlken tabynýshylyq mánge ıe. Sonysymen qundy hám erekshe.
Avtor lakonıkalyq sýretti kók tústi qaǵazǵa jazyp, ony aq jáne sur boıaýmen syrlaǵan. Áıtse de odan týyndynyń mádenı hám dinı maǵynasy ózgermeıdi. Munda qartaıǵan adamnyń ájimderi men tamyrlary kózge ottaı basylady. Belgili bir sıpattaǵy dınamıkada boıalǵan qoldar oqyrmannyń tańdanysyn týdyrady. Sondyqtan bul sýretti álemdik muranyń mańyzdy shyǵarmalary qataryna qosýǵa bolady.
