Taraz qalasynda jazýshynyń eńseli eskertkishi ashyldy. Saltanatty sharaǵa Aqparat jáne qoǵamdyq damý mınıstri Darhan Qydyráli arnaıy bardy. Mınıstr kópshilikke Memleket basshysynyń quttyqtaý hatyn oqyp berdi.
«Aqıqattyń aldaspany, namystyń narkeskeni atanǵan ardaqty Sheraǵań sanaly ǵumyryn ult rýhanııatynyń damýyna arnaǵan qarymdy qalamger, qaıratker tulǵa edi.
Sóz zergeri Sherhan Murtaza jýrnalıstıkada tutas bir býyndy tárbıelep, talanttarǵa jol ashqan, ózindik mektebin qalyptastyrǵan qazaq baspasóziniń máýeli báıteregi boldy. Abyroıly azamat retinde bıik minberlerde eldik máselelerdi kóterip, ult múddesi jolynda aıanbaı kúresti.
Jazýshynyń qalamynan týǵan qundy týyndylar ýaqytpen birge jasap, óskeleń urpaqtyń jadynda jańǵyra bereri anyq. Onyń qazaq rýhanııatyndaǵy orny men jarqyn beınesi eshqashan umytylmaıdy», dep jazylǵan Prezıdenttiń quttyqtaýynda.
Eskertkishtiń ashylý saltanatynan keıin «Kóne Taraz» tarıhı-etnomádenı keshenindegi Kórme pavılonynda «Sherhantanym: qazirgi qazaq ádebıeti men qazaq baspasóziniń damý tendensııalary» taqyrybyndaǵy ǵylymı-tájirıbelik konferensııasy uıymdastyryldy.
Jospar boıynsha tústen keıin Jýaly aýdany Talapty aýylyndaǵy Sherhan Murtazanyń ádebı-memorıaldy úıiniń (ózi turǵan úıi) ashylý saltanaty ótedi.
Aıta keteıik, memleket jáne qoǵam qaıratkeri, halyq jazýshysy Sh.Murtazanyń 90 jyldyq mereıtoıyn atap ótýge negizdelgen is-sharalarǵa aqyn, jazýshy, Qazaqstannyń Eńbek eri Muhtar Shahanov, memleket jáne qoǵam qaıratkeri Orazkúl Asanǵazyqyzy, QR Parlamenti Senatynyń depýtaty, doktor, professor, QR Ulttyq ǵylym akademııasynyń akademıgi M. Qul-Muhamed, Qazaqstan Respýblıkasynyń Aqparat jáne qoǵamdyq damý mınıstri Qydyráli Darhan Qýandyquly, jazýshy, qoǵam qaıratkeri Nurlan Orazalın syndy belgili tulǵalar shaqyrylǵan.
