Otandyq fýtbolshy jáne fýnksıoner Mıhaıl Gýrmannyń qurmetine ótkizilgen el birinshiliginiń sońǵy týrynda chempıondyqtan úmitker «Astana» Qaraǵandyǵa sapar shegip, jergilikti «Shahter» klýbymen kezdesse, «Aqtóbe» óz alańynda Almatynyń «Qaıratymen» jasyl alańda jolyqty. Jarys jeńimpazyn anyqtap beretin eki matchta da bas júldeden úmitti komandalar jeńiske jetkenimen, sońǵy týr aldynda «Aqtóbeniń» aldyn orap ketken elordalyq ujym Qazaqstan birinshiliginiń 30-shy maýsymynda top jardy. 26-týrda «Astana» syrt alańda «Shahterdi» 3:2 esebimen tize búktirse, «Aqtóbe» jankúıerleriniń qyzý qoldaýynyń arqasynda «Qaıratty» iri eseppen jeńdi – 4:1. Osylaısha, «Astana» – chempıon, «Aqtóbe» fýtbolshylary kúmis júldeni moınyna ildi.
«Qaırattyń» sońǵy týrdaǵy jeńilisin Qostanaıdyń «Tobyly» tıimdi paıdalanyp, týrnır kestesindegi úshinshi ornyn saqtap qaldy. Oralda jergilikti «Aqjaıyqpen» oınaǵan «Tobyl» bul matchta jeńiske jetip qana qoımaı (3:1), alań ıelerin Premer-lıgadan shyǵaryp jiberdi. Sóıtip, «Aqjaıyq» kelesi maýsymdy Birinshi lıgada ótkizetin boldy. Igor Sergeev pen Serj Deble dýbline «Aqjaıyq» fýtbolshysy Ilıa Kovalenko bir doppen jaýap qaıtarǵanymen, komandasyn joǵary topta saqtap qala almady. Deı turǵanmen, Oral klýby úshin bıylǵy fýtbol maýsymy áli aıaqtalǵan joq. Olar 12 qarashada Shymkenttiń «Ordabasy» klýbymen Qazaqstan kýbogyn sarapqa salady. Jeńiske jetken ujym keler jylǵy Eýrokýbok oıyndaryna joldama alady.
Sondaı-aq kelesi jyly «Aqjaıyqpen» birge Túrkistannyń «Turany» da Birinshi lıgada dop tebetin boldy. Birer jyl buryn ǵana joǵary topqa qosylyp, ataýyn «Turan» dep ózgertken ońtústiktiń komandasy sońǵy týrda «Tarazdan» basym tússe de (3:2), báribir Premer-lıgadaǵy ornyn saqtap qala almady.
Al Birinshi lıgada jeńiske jetken Kókshetaýdyń «Oqjetpesi» men ekinshi orynǵa taban tiregen Qyzylordanyń «Qaısary» Premer-lıgaǵa joldama jeńip aldy. «Oqjetpes» 2019 jylǵy maýsymnyń qorytyndysy boıynsha tómengi lıgaǵa túsip qalǵanyn jankúıerler jaqsy biledi. Endi, mine, araǵa eki jyl salyp, joǵary topqa qaıta qosyldy. «Qaısar» Birinshi lıgada bir ǵana maýsym ótkizdi. Sóıtip, kelesi jylǵy el chempıonatynda «Oqjetpes» pen «Qaısar» «Aqjaıyq» pen «Turannyń» ornyn basatyn boldy.
Bıylǵy fýtbol maýsymynyń statıstıkasyna az-kem toqtalyp óter bolsaq, 26 týrda 53 upaı jınap, chempıon atanǵan «Astana» osymen jetinshi márte qos qulaqty kýbokty oljalap, el birinshiliginde eń kóp jeńiske jetken komanda retinde rekord ornatty. Buǵan deıingi rekord ta «Astanaǵa» tıesili edi. Qazaqstan chempıonatynda bes márte top jarǵan «Aqtóbe» ekinshi orynda keledi. Sondaı-aq elordalyq komanda 26 týrdyń 16 kezdesýinde jeńiske jetip, 5 matchta qarsylastarymen teń tússe, 5 oıynda jeńilistiń kermek dámin tatýǵa májbúr boldy. «Astana» fýtbolshylary qarsylastary qaqpasyna jalpy sany 65 gol soǵyp, óz qaqpalaryna 24 gol ótkizip aldy.
Bir maýsymda 18 gol soqqan «Astananyń» portýgalııalyq fýtbolshysy Pedro Eýjenıo úzdik surmergen atandy. Ekinshi oryndy «Astananyń» taǵy bir ókili, horvatııalyq Marın Tomasov (15) ıelense, úzdik úshtikti «Atyraýdyń» shabýylshysy Andrııa Fılıpovıch (13) túıindedi. Baıqap otyrsańyzdar úsh mergen de legıoner.
Chempıonattyń eń tártipsiz komandasy retinde birinshilik debıýtanty «Maqtaaral» kózge tústi. 26 oıynda Túrkistan oblysy klýbynyń jeti fýtbolshysy tóreshi tarapynan «qyzyl» qaǵazben jazalanyp, alańnan qýylǵan. Keıingi oryndarǵa «Turan» (6), «Shahter», «Qaırat», «Taraz» (5) klýbtary jaıǵasqan. Al «Astana» men «Qyzyljar» fýtbolshylaryna tek bir-bir márte «qyzyl» qaǵaz kórsetilgen. Jalpy, osy maýsymda 51 fýtbolshynyń «qyzyl» qaǵazben jazalanǵanyn aıta keteıik.
