9 aıdyń qorytyndysynda 2023 jyly ornalastyrý oryndary qyzmet kórsetken ishki týrıster sany 2022 jyldyń sáıkes kezeńimen salystyrǵanda 553 myńǵa artyp, 5,4 mln adamǵa jetti. Bul kórsetkish pandemııaǵa deıingi kezeńmen salystyrǵanda 1,3 mıllıon adamǵa kóp. Osy oraıda 2019 jyldyń 9 aıynda el ishinde 4,1 mln adam saıahattaǵanyn eske sala ketken jón.
«Keıingi jyldary sheteldik týrısterdiń Qazaqstanǵa degen qyzyǵýshylyǵy arta bastaǵany baıqalady. Máselen, bıyl elimizge 800 myńnan asa sheteldik kelgen. Jyl sońyna deıin bul kórsetkish 1,4 mıllıonǵa deıin jetýi múmkin degen boljam bar. Buǵan elimizdiń kórse kóz toıatyn tabıǵı sulýlyǵy, mádenı baı muramyz jáne qonaqjaılyǵymyz dálel bola alady. Biz elimizdi týrıster úshin odan da tartymdy ári qyzyqty etý jáne baıtaq jerimizge tabany tıgen árbir saıahatshyǵa umytylmas áser qaldyrý úshin tyrysamyz», dedi Týrızm ındýstrııasy komıteti tóraǵasynyń mindetin atqarýshy Nurtas Káripbaev.
