Delegasııanyń birinshi bolyp aıaq basqan nysany – qýaty bir mezgilde 35 myń bas iri qara maldy jaılaýǵa jetetin Southern Cross Feedlot zamanaýı bordaqylaý alańy edi. Otandyq agrarııler zamanaýı jabdyqtarmen, ınfraqurylymmen, azyqtandyrý ádisterimen, dıirmenmen, sondaı-aq osyndaı iri alańdy basqarý qaǵıdattarymen tanysty.
«Bizben birge Qazaqstannyń mol tájirıbesi bar mal ósirýshileri keldi. Biz rasıon quramyn, bordaqylaý ádisterin zerttedik, fermerlerimiz seriktestik joldaryn jáne Qazaqstanda mal sharýashylyǵyn qalaı damytý kerektigin talqylady. Aýstralııa jerinde egin egilgenin nemese mal jaıylyp jatqanyn kórdik, bizde de osylaı bolǵanyn qalaımyz», dedi Parlament Májilisiniń depýtaty Aıdarbek Qojanazarov.
35 myń basty baǵatyn mundaı fermaǵa ınvestısııa kólemi shamamen 25-30 mln dollardy quraıdy, qaıtarymy bir-eki jylda bolady, sodan keıin baryp qana fermer taza paıda ala bastaıdy. Aýstralııalyq fermerlerdiń aıtýynsha, 5 myń basqa arnalǵan bordaqylaý alańy salynǵannan keıin qýatty odan ári keńeıtý úshin qosymsha ınvestısııalar qajet emes.
«Munda búkil qyzmet kórsetý júıesi basqasha. Mysaly, maldy bólý – bári tolyǵymen avtomattandyrylǵan. Tipti bólý konstrýksııalary da basqasha. Bizdegi konstrýksııalar túzý, al munda janýarlardy qorqytpas úshin ıilip jasalǵan. Alań bıik ornalasqan, sondyqtan onda ylǵal turaqtamaıdy, tómen qaraı aǵyp, arnaıy drenajdarǵa jınalady. Osylaısha, janýarlardyń tuıaqtary lastanbaıdy. Minsiz tazalyq», dep «Atameken Agro» AQ basqarma tóraǵasy Kıntal Islamov óz sharýashylyǵynda atalǵan ádisti engizýge qyzyǵýshylyq tanytty.
Janýardy mal bordaqylaý alańyna ákelgen kezde qulaǵyndaǵy bırka arqyly ony esepke alý úderisi, parametrleri men tarıhy avtomatty túrde oqylady. Mal satylatyn el standarttaryna sáıkes ártúrli bordaqylaý baǵdarlamalary boıynsha bólinedi. Bul fermada 4 bordaqylaý baǵdarlamasy bar: EO elderi úshin, 150, 200 jáne 350 kúnge. 25 turaqty jumysshy jumyldyrylǵan.
Bul fermada mal kún saıyn 1,5-2 kg salmaq qosady. О́ndiristiń arzandaýy aýstralııalyq fermerlerdiń negizgi bóliginde jaıylymnyń kezektesý ádisine, bordaqylaýdyń úsh kezeńine, qaldyqtardy tolyq óńdeýge baılanysty bolyp otyr. Ár kezeńdegi shyǵyndardy azaıtý jáne bırjada jaqsy uıymdastyrylǵan mal saýdasy salynǵan ınvestısııadan meılinshe tez paıda alýǵa múmkindik beredi.
Qoılardy bordaqylaýǵa da uqsas ekonomıkalyq tásil qoldanylady. Bizdiń mamandar onymen Bakersfield Feedlot bordaqylaý alańyna barǵan kezde tanysty. Tolyq avtomattandyrylǵan jem berý júıesi bir mezgilde 16 myń qozyny bordaqylaýǵa múmkindik beredi, jyl saıynǵy aınalym – 65 myńnan astam bas.
«Bizdiń ónerkásip alańynyń aýdany – shamamen 11 myń ga. Fermadaǵy bir jyldyq mal sany – 60-tan 90 myńǵa deıin. Men ettiń ónimdiligine, mármárligine, jumsaq bolýyna jaýap beremin», dedi bordaqylaý alańynyń ıesi Aaron Prettedjon.
Qoı klasterinde jumys isteıtin «Alakól agro» JShS ókili Ilııas Jananovtyń aıtýynsha, otandyq óndiristiń áleýeti jaqsy jáne osyndaı jartylaı avtomattandyrylǵan jem berý júıesi bizge de paıdaly bolar edi.
