Foto: Depositphotos
О́ńirlik sport basqarmalary men ulttyq sport federasııalaryna bıýdjet qarajatyn únemdep, qarjylandyrýdyń qaıtalanýyn boldyrmaý úshin «1 óńir – 1 klýb – 1 sport túri» qaǵıdatyn ustaný usynyldy. Bul týraly búgin Týrızm jáne sport mınıstriniń orynbasary Serik Jarasbaev Týrızm jáne sport mınıstri Erbol Myrzabosynovtyń tóraǵalyǵymen ótken óńirlik basqarmalardyń, vedomstvolyq baǵynysty uıymdardyń, sport federasııalary basshylarymen ótken keńes barysynda málimdedi.
Bıyl maýsymda kúshine engen «Dene shynyqtyrý jáne sport týraly» zańǵa sáıkes, komandalyq sport túrleri boıynsha kásibı klýbtardy qarjylandyrýǵa shekteý engizildi. Bul – qarjynyń ashyq ári tıimdi jumsalýyn qamtamasyz etip, klýbtardy balama qarjy kózderin tartýǵa baǵyttalǵan mańyzdy qadam.
Sondaı-aq zań boıynsha sheteldik sportshylardy ustaýǵa jáne olarǵa eńbekaqy tóleýge bıýdjet pen kvazımemlekettik sektordyń qarajatyn paıdalaný tyıym salyndy. Bul sheshim jergilikti kadrlardy qoldaýǵa, otandyq sportshylardyń básekege qabilettiligin arttyrýǵa jáne ulttyq sport mektepterin damytýǵa baǵyttalǵan.
Jańartylǵan zań aıasynda sportty strategııalyq turǵydan damytýǵa baǵyttalǵan birqatar mańyzdy normalar engizildi.
Basym sport túrleri aıqyndaldy
Mınıstrlik Olımpıada, Paralımpıada, Sýrdlımpıada, Azııa jáne Azııa Para oıyndaryndaǵy ulttyq quramalardyń nátıjelerin eskere otyryp, 60-tan astam basym sport túriniń tizimin bekitti.
11 ulttyq sport túri basym sport túrleri qataryna engizildi
Bıyldan bastap ulttyq sport túrleri de olımpıadalyq baǵyttarmen qatar maqsatty qarjylandyrýǵa jáne joǵary jetistikter sporty retinde júıeli damýǵa múmkindik alady.
«Múgedektigi bar sportshyny súıemeldeýshi» uǵymy zańmen bekitildi
Zańnamada alǵash ret I toptaǵy múgedektigi bar sportshyny alyp júretin tulǵa uǵymy engizildi. Bul norma olardyń jattyǵý men jarystarǵa teń qol jetkizýin qamtamasyz etip, sporttaǵy ınklıýzıvtilikti arttyrýdy kózdeıdi.
Sport uıymdary basshylary úshin rotasııa júıesi engizildi
Endi sport uıymdarynyń basshylary 5 jyl merzimge taǵaıyndalady. Kadr tapshylyǵy bar óńirlerde rotasııa oblys ishindegi kórshiles aýdandar arasynda júzege asyrylady.
Qabyldanǵan sharalar – otandyq sportty turaqty ári tıimdi model boıynsha damytýǵa baǵyttalǵan keshendi reformanyń bir bóligi. Týrızm jáne sport mınıstrligi zańda kózdelgen normalardy memlekettik saıasat aıasynda iske asyryp, olardyń oryndalýyn barlyq deńgeıde qamtamasyz etedi.
