О́ńirde Jer kodeksine engizilgen ózgeristerdi tereńirek túsindirý jumystary belsendi júrgizilýde. Jaqynda oblysta jer máseleleri boıynsha azamattardy qabyldaý qosyndary ashylyp, jumys isteı bastady. Tek Aqtóbe qalasynda ǵana tórt qosyn ashyldy. Olardyń barlyǵy jer máselelerin túsindirý maqsatynda oblys ákimi Berdibek Saparbaevtyń tapsyrmasy boıynsha ashylyp otyr. О́ńir basshysynyń bul bastamasyn jer reformasy boıynsha úshjaqty komıssııanyń, qoǵamdyq keńes jáne ózge de qoǵamdyq birlestikterdiń músheleri qoldady. Qosyndar Tahaýı Ahtanov atyndaǵy oblystyq drama teatrynda, Ǵazıza Jubanova atyndaǵy oblystyq fılarmonııada, Qazaqstan halqy Assambleıasy men «Nur Otan» partııasynyń ǵımarattarynda ornalasqan. Aqtóbelikterdi «Alash joly» qozǵalysy, qoǵamdyq birlestikter men saıası partııalar, atqarýshy bılik ókilderi qabyldap, jerge qatysty usynys-pikirlerin tyńdaýda.
Turǵyndardy qabyldap jatqan Baqyt Janshaevanyń aıtýynsha, oblystyq fılarmonııadaǵy qosynǵa 50-den astam adam jolyqqan.
– Azamattardy jeke turǵyn úı qurylysyna qajetti jer telimderin berý, jumyspen qamtý, óz sharýasyn damytý úshin nesıe alý, sharýa qojalyqtaryn ashý sekildi túrli saýaldar mazalaıdy. Iаǵnı, Jer kodeksine engizilgen ózgeristerge qatysty saýaldar shyn máninde az, – deıdi Baqyt Janshaeva.
Úshjaqty komıssııanyń, aqtóbelik «Alash joly» bastamashyl qozǵalysynyń múshesi Kóshkinbaı Ahmetov aqtóbelikterdi «Nur Otan» ǵımaratynda ornalasqan qosynda qabyldady.
– Árıne, biz oblys ákiminiń usynysyn qoldadyq. Munda oblystyq komıssııa, atqarýshy organ, saıası partııalar, qoǵamdyq uıymdardyń ókilderi qatysyp otyr. Olardyń árbiri naqty jaýap berip, quzyrly organdardyń nazaryna barlyq usynystardy jetkizbekshi, – dep atap ótti ol.
Aıta ketý kerek, azamattardy qabyldaý qosyndaryna barlyǵy 100-den astam adam kelgen. Mundaı oryndar oblystyń aýdandarynda da uıymdastyrylǵan.
Ústimizdegi jylǵy 3 mamyrda jer máselesine baılanysty oblysta úshjaqty komıssııa qurylǵan bolatyn. Oǵan «Alash joly» qozǵalysynyń belsendileri, saıası partııalar men ÚEU ókilderi endi. Olardyń maqsaty oblys turǵyndarynan kelip túsken barlyq usynystar men tilekterdi saraptap, respýblıkalyq komıssııa qaraýyna joldaý bolyp tabylady.
Satybaldy SÁÝIRBAI,
«Egemen Qazaqstan»
Aqtóbe oblysy