Meksıka, AQSh, Kanada elderi tize qosyp ótkizip jatqan fýtboldan álem chempıonaty tartysqa toly saıysymen tórtkúl dúnıeni ózine qaratyp otyr. Ortalyq Azııa elderinen alǵash bolyp álemdik mýndıal dodasyna qatysý joldamasyn enshilegen О́zbekstan ulttyq quramasy birinshi týr oıynynyń tartysyna túsip, tegeýrindi oıyn órnegimen daralandy, dep jazady Egemen.kz.
«K» tobyndaǵy ekinshi match Meksıkada ótti. Bıylǵy álemdik alamannyń ashylý saltanaty men betashar matchty qabyldaǵan Mehıkonyń áıgili «Asteka» stadıonynda О́zbekstan men Kolýmbııa quramalary sheberlik baıqasty. Álem chempıonatyna tuńǵysh ret at baılaǵan ózbek aǵaıynnyń ulttyq quramasy jahan dodasyn jatyrqaǵan joq. Jasyl alańda jasyn oınatyp, qarsylastyń qysymyna toıtarys bere jiger tanytty. Qorǵanys shebiniń myqtylyǵy sonshalyq, kolýmbııalyq fýtbolshylardy tyrp etkizgen joq. Olaı deıtinimiz kolýmbııalyq shabýylshylar О́tkir Júsipov qorǵaǵan О́zbekstan ulttyq quramasynyń qaqpasyna alǵashqy týra soqqyny tek 17-mınýtta ǵana baǵyttaı aldy. Anglııanyń «Manchester Sıtı» komandasynda oınaıtyn talantty Abdýqadyr Hýsanov bastaǵan tasqamal qorǵanysty buza alǵan joq. Degenmen de múmkindikti múlt jibermeıtin Kolýmbııa quramasy dittegenine jetti. Matchtyń 40-mınýtynda Mýnos esep ashyp, kolýmbııalyqtar alǵa ozǵan. Ekinshi taımda eńse tiktegen ózbek fýtbolshylary 60-mınýtta gol soqty. 22 jastaǵy О́zbekstannyń altyn aıdarly saqasy Abbosbek Faızýllaev álem chempıonatyndaǵy alǵashqy golyn enshisine jazdy. Qarshyǵadaı ǵana juqaltań jigit Kolýmbııa quramasynyń eńgezerdeı qorǵaýshylaryn kádimgideı sastyrdy. Eýropanyń eńseli klýbtarynda shyńdalǵan Eldor Shomýrodov bastaǵan ózge jigitter de jasyndaı jarqyldady.
Ronaldý gol soǵa almady: Portýgalııa men Kongo teń tústi
О́zbekterdiń de álem chempıonatyndaǵy alǵashqy matchynan upaı alatyn múmkindigi bolǵan edi. 65-mınýtta kolýmbııalyq jartylaı qorǵaýshy Lýıs Dıas enshisine gol jazyp, komandasyn alǵa shyǵardy. О́zbekstan quramasynyń oıynshylary qarymta shabýyldy óristetý taktıkasyna súıenip, dop aıyrmashylyǵyn qysqartýǵa baryn saldy. Bas tóreshi Entonı Teılor (Anglııa) ekinshi taımnyń negizgi ýaqytyna 8-mınýt qosty. 90+8 mınýtta alańǵa 72-mınýtta shyqqan Hamınton Kampas úshinshi goldy soǵyp ketti. Match túgesiler tusta О́zbekstan quramasynyń qorǵaýshysy Behrýdjon Kárimovtyń alystan shirene tepken soqqysy Kolýmbııa quramasynyń qaqpasy mańdaıynan qaıtty.
Anglııa quramasy Horvatııadan basym tústi
Italııalyq maman Fabıo Kannavaro baptaıtyn О́zbekstan ulttyq quramasy bul álem chempıonaty qatysý jolynda talaı ot pen sýdan ótti. Azııanyń azýly quramalaryn yǵystyrdy. Endi olar toptaǵy ekinshi matchynda Portýgalııa quramasyna qarsy oınasa, kolýmbııalyq fýtbolshylar kongolyq qarsylasynan upaı oljalaýǵa umtylady. 2006 jyly álem chempıony atanyp, «Altyn dopty» qanjyǵasyna bóktergen F.Kannavaro arada 20 jyl ótkende bas bapker retinde jahandyq dodada biliktiligin synap jatyr. Bul álem chempıonatynda О́zbekstan quramasynyń múshelerine de fýtbol skaýttarynyń nazary túsetini anyq. Hýsanovtaı talanttar túlegen tuǵyrda áli de tańdaýly tastúlekter qanatyn qomdap samǵaýǵa saqadaı-saı otyr.
Álemdik mýndıalda О́zbekstan quramasynyń toptyq kezeńnen shyǵýǵa áli de múmkindigi bar.
Aıtpaqshy, búgingi О́zbekstan – Kolýmbııa quramalary tartysynyń tikeleı translıasııasyn jankúıerlermen birge tamashalaý oraıy týdy. Igi isti О́zbekstannyń Qazaqstandaǵy elshiligi uıymdastyrdy.
Álem chempıonaty: О́zbekstan quramasy Kolýmbııaǵa qarsy matchta minez kórsetti