Eýropanyń iri qalalarymen ıyq teńestire bastady
Byltyr qalanyń ekonomıkasyna tartylǵan ınvestısııalardyń jyl saıynǵy ósimi 397 mıllıard teńgeden 773 mıllıard teńgege deıin 1,5 esege artty. О́z kezeginde elordanyń halyqaralyq reıtıngisin Vaa3 deńgeıine deıin kóterýge ári Barselona, Ystanbul sekildi álemniń birqatar qalalarymen teńesýge múmkindik berdi.
Bul týraly qalalyq máslıhattyń kezekten tys sessııasynda Astana qalasy ákiminiń orynbasary Andreı Lýnın málimdedi.
– Qalany damytýdyń 2011-2015 jyldarǵa arnalǵan baǵdarlamasy júzege asyrylǵan bes jylda jalpy óńirlik ónim kóleminiń kórsetkishi 2010 jylǵy 1 trıllıon 800 mıllıard teńgeden 2015 jyly 4 trıllıon 600 mıllıard teńgege deıin 1,6 esege ulǵaıdy. О́tken jyldyń qorytyndysy boıynsha elordada ekonomıkalyq ósimniń oń úrdisi – 106,3 paıyz. Bul rette Astananyń respýblıkanyń ishki jalpy óniminiń kólemindegi úlesi 8 paıyzdan 11 paıyzǵa deıin ósti. О́nerkásiptik óndiris kólemderiniń naqty kórsetkishi 2010 jylmen salystyrǵanda 111 mıllıard teńgeden 348 mıllıard teńgege deıin, 1,4 esege artty, – dedi Andreı Lýnın.
Ol sondaı-aq, Qazaqstan astanasynyń týrıster úshin de asa tartymdy ekenin aıtty. Bes jyl ishinde elordaǵa 3 mıllıonnan astam qonaq kelgen. Onyń ishinde 650 myńy – sheteldikter.
Aıan ÁBDÝÁLI,
«Egemen Qazaqstan»