IV halyqaralyq «KADEX-2016» qarý-jaraq pen áskerı tehnıka kórmesiniń bastalýyna sanaýly kúnder qaldy. Kórsetiletin tehnıka kórme ótkiziletin orynǵa shoǵyrlana bastaıdy. Al uıymdastyrýshylar kelýshiler men qatysýshylar úshin sońǵy jumystardy júrgizip jatyr.
«KADEX-2016» kórmesine kelýshiler qorǵanys ónerkásibiniń kórsetiletin obektilerin óz kózimen kórip, erekshe áser alyp qana qoımaı, kórmeni uıymdastyrýshylar daıyndaǵan sharalarǵa kóńilderi tolyp, bir marqaıyp qalary anyq.
Qoǵamdyq tamaqtanýdy uıymdastyrý úshin kórmege qatysýshylar men kelýshiler úshin ulttyq stıldegi 10 kıiz úı tigiledi. Eki kıiz úıde ulttyq kádesyılar satylady, bireýinde qazaq turmysynyń dástúri men mádenıetin, qalǵan jeteýinde ulttyq as máziri, ıaǵnı qazy-qarta, qymyz, shubat, kóje, sondaı-aq, ózge elderdiń taǵamdary satylymǵa shyǵarylady. Taǵam baǵalary naryq baǵasyna qaraǵanda qoljetimdi bolady. Muny uıymdastyrýshylar aıtyp otyr.
Bir kúnde 1500-2000 adamǵa qyzmet kórsetiledi dep kútilýde eken. Odan basqa, meımandar úshin ulttyq jáne eýropalyq as máziri bar «Lagýna» eki palatkaly meıramhanasy ashyq bolatyn kórinedi. Jáne bir aıta óterligi – taza aýada otyryp tamaqtanýǵa da múmkindik jasalmaqshy eken. Uıymdastyrýshylar, sondaı-aq kórmege qatysýshylar men qonaqtarǵa úsh jerde fastfýdy jáne salqyndatylǵan sýsyndary bar, tez tamaqtaný palatkalary men pavılondar qyzmet kórsetetinin jetkizdi. Qoǵamdyq tamaqtaný oryndary kórme bastalǵan sátten bastap sońǵy klıentke deıin ashyq bolatyny da atap ótildi.
IV halyqaralyq «KADEX-2016» qarý-jaraq pen áskerı tehnıkalar kórmesi qorǵanys salasyndaǵy aýqymdy is-sharalardyń birine aınalyp otyr. Ol qorǵanys ónerkásibi salasy mamandarynyń ǵana emes, sonymen birge, buqaralyq-medıanyń da nazaryn aýdartýda. Kórmeden álemniń kóptegen elinen 300-den asa buqaralyq aqparat quraldarynyń ókilderi aqparat taratatyn bolady.
Sáýlebek BIRJAN