Teorııany óndirispen ushtastyra oqytý tehnologııasy dýaldy oqytý júıesi bolyp tabylady. Atalǵan júıeniń kásiptik jáne bilikti mamandar daıarlaý barysyndaǵy tıimdiligi men nátıjeligi áldeqashan dáleldengen. Dúnıejúzin qamtyǵan oqytýdyń osy túri ýaqyt sanap óziniń jemisin berip keledi. Árıne, damýshy memleket retindegi bizdiń bul júıeden qalys qalmaýymyz oryndy. Sondyqtan da, Elbasy «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı jıyrma qadam» tujyrymdamasynda kadrlar biliktiligi jaıynda erekshe aıta otyryp, elimizde dýaldy oqytý júıesin engizý qajettigin atap kórsetken bolatyn.
Bul oraıda Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Energetıka mınıstrliginiń munaı ónerkásibin damytý departamenti dırektorynyń orynbasary Baqyt Mahanovtyń aıtýy boıynsha, munaı baǵasynyń tómendeýine baılanysty qarjylyq qıyndyqtarǵa qaramastan, «QazMunaGaz» kompanııalar toby dýaldy bilim berý boıynsha oqý ortalyqtarynyń qurylysyn qarastyryp otyr. Bul nysandardyń ishinde jataqhana, jabdyqtar jáne uńǵymalardy jóndeýge negizdelgen qondyrǵylar qamtylady. Jáne de atalǵan oqytý júıesin munaı jáne gaz salasy boıynsha alǵash bolyp qolǵa alǵandar qatarynda «Pavlodar munaı-hımııa zaýyty» JShS, «QazMunaıGaz» BО́» AQ kompanııasy toby jáne Atyraý munaı-gaz ınstıtýty men Qazaqstan-Brıtan tehnıkalyq ýnıversıteti bar ekendigin eske saldy. Bizdiń oıymyzsha, qazaqstandyq munaıshylar dýaldy oqytý júıesin damytýda barlyq múmkindikterge ıe. Dýaldy oqytý baǵdarlamalary munaı-gaz salasynyń kompanııalaryna qosymsha joǵary bilikti tehnıkalyq kadrlar daıarlaýda tıimdi múmkindikterge jol ashady, sondaı-aq, usynylatyn kásibı baǵdarlamalardyń kóptúrliligin arttyrý men osy sala boıynsha oqyp jatqan jastardyń jan-jaqty bolýyna yqpal etedi, dedi ol. Jáne de daıyndalǵan kadrlar oqýdy támamdaǵannan keıin birden óndiriske aralasa alatynyn, ıaǵnı kásibı beıimdelýdiń qajettiligi bolmaıtynyn kóldeneń tartty.
Elmıra MÁTIBAEVA,
«Egemen Qazaqstan»