Qaryndastyń qamy úshin...

Para bergen basshy 48 mıllıon teńge aıyppul tóleıdi Tenderdiń tasasynda kózge kórin­beı­tin talan-tarajdyń túri bar. Tipti, aǵaı­yn-týystyń qamy úshin memlekettik qyz­metkerge qoıylatyn talap pen tártip­ti tárk etetin basshy da tabylyp otyr. Kim deısiz be? Qatardaǵy jaı qyzmetker emes, laýazymdy tulǵa, naqtylaı aıt­qan­da, ol – Jylyoı aýdandyq turǵyn úı-kom­­mýnaldyq sharýashylyq, jolaý­shylar kóligi jáne avtomobıl joldary bó­liminiń basshysy Amanqos Ábe­nov. Memlekettik qyzmette 7 jyldan astam tájirıbesi bola tura, óziniń qaryn­dasy A.Imanbaeva jumys isteıtin «Tep­lo­teh­nıka» jaýapkershiligi shekteýli serik­testiginiń qamyn oılaýǵa bekem bel býypty. Sóıtip, osy seriktestiktiń memle­kettik satyp alý konkýrsyna qatysý kezeńinde jeńimpaz bolýyna múd­deli bolǵan. Osy oraıda ózi qyzyǵýshylyq tanyt­qan seriktestikti jeńim­paz atandy­rýǵa yqpal etkeni jáne qamqor­lyǵy úshin oblystyq memlekettik satyp alý basqar­masynyń memlekettik satyp alý jáne monı­torıngileý bóliminiń bas mamany K.Muh­tarovqa para bergen. Para mólsheri – 1 600 000 teńge. Desek te ol shynymen qaryndasynyń qamyn oılady ma, álde basqa sebebi bar ma? Bizdińshe munyń astarynda bir gáp bar sekildi. Aldymen aıtarymyz, Amanqos Ábenov memlekettik qyzmette 2007 jyl­dan beri tájirıbe jınaǵan. Áýeli Ja­ńa Qaraton kenti ákiminiń mindetin atqa­rýshy bolýdan bastalǵan mansaby sol jyldyń qyrkúıeginde Jylyoı aýda­ny ákiminiń orynbasarynyń mindetin atqa­rýshy bolýmen jalǵasypty. Sodan keıingi 2008-2010 jyldary aýdan ákiminiń oryn­basary bolypty. Al 2010 jyldyń aqpa­nynda atalǵan bólimniń basshylyǵyn qoly­na alǵan. Munyń bárin tizbelegendegi aıt­paǵymyz, qaryndasynyń qamyn oıla­ǵysh «qamqorshy» memlekettik qyzmet­ke kelgenge deıin «Teplotehnıka» serik­testigine 4 jyl boıy dırektor bolypty. Osy derekke qaraǵanda, oǵan «Tep­lotehnıka» JShS áýelden jat emes bolýy kerek. Alaıda, №2 Atyraý qalalyq soty Amanqos Ábenovti Qylmystyq Ko­dekstiń 367-babynyń 2-bóliginde kóz­delgen qylmysty jasady dep tanydy. Osyǵan baılanysty atalǵan bap boıyn­sha ony memlekettik qyzmetti atqarý quqy­ǵynan ómir boıyna aıyryp, ózi usyn­ǵan paranyń 30 eselengen somasy mól­sherinde, ıaǵnı 48 000 000 teńge aıyppul salý jazasyn taǵaıyndady. Osylaısha, Jy­lyoı aýdandyq ákimdiginiń para ber­gish laýazymdy qyzmetkeri laıyqty jazasyn aldy. Joldasbek ShО́PEǴUL, «Egemen Qazaqstan» Atyraý oblysy