[caption id="attachment_48809" align="aligncenter" width="560"] Foto: vk.com[/caption]
Eýropa chempıonatynyń 1/8 fınalynda óner kórsetken Anglııa men Islandııa quramalary Nıssa qalasynda kezdesti.
Anglııa – Islandııa 1:2 (1:2)
Stadıon: «Alıans Rıvera».
Tóreshi: Damır Skomına.
Anglııa: Hart, Ýoker, Kehıll, Smollıng, Roýz, Allı, Daıer (Ýılsher 46), Rýnı (Reshvord 87), Starrıdj, Keın, Sterlıng (Vardı 60)
Islandııa: Haldersson, Sevarsson, Arnason, Sıgýrdsson, Skýlason, Gýdmýndsson, Sıgýrdsson, Gýnnarsson, Bıarnason, Sıgtorsson (Bıarnason 77), Bedvarsson (Traýstason 88)
Goldar: Rýnı 4 (penaltı) – Sıgýrdsson 6, Sıgtorsson 19
Eskertý alǵandar: Starrıdj 48 – Sıgýrdsson 38, Gýnnarsson 66
Basqasy basqa, biraq fýtboldyń otany atanǵan Anglııa quramasynyń jarys jolynan pleı-off kezeńinde shyǵyp qalady dep eshkim oılamaǵan bolsa kerek. Talantty oıynshylardan jasaqtalǵan. Onyń ústine dúbirli dodaǵa qatysatyndardyń arasynda eń jas komanda atanǵan edi. Alaıda, fýtbolda munyń ózi de mańyzdy ról atqarmaıtyny dáleldendi. Nebári 330 myń halqy bar, óziniń kásibı deńgeıde óner kórsetetin birde bir fýtbol klýby joq Islandııa jankúıerlerdiń ystyq yqylasyna bólenip úlgerdi.
Match bastala sala shabýylǵa shyqqan aǵylshyndar oıynnyń 4-mınýtynda penaltı teýip úlgerdi. Haldersson men Sterlıngtiń arasyndaǵy dopqa tartysta tóreshi oıyn tártibi buzylǵanyn anyqtap, 11-metrlik aıyp dobyn belgiledi. Bul tusta Rýnı óz múmkindigin múlt jibermedi. Osydan keıin ıslandııalyqtardyń qarqyny basyldy-aý dep oılaǵanda, kútpegen jerden araǵa eki-aq mınýt salyp, aıyp dobynan áýelegen dopty qaqpaǵa týra baǵyttaǵan Sıgýrdsson tarazy basyn teńestirdi. Al 19-mınýtta Sıgtorsson ekinshi goldy soǵyp, Islandııa quramasynyń shırek fınalǵa shyǵýyna sebep bolar mańyzdy doptyń avtory atandy. Anglııa bul tyǵyryqtan shyǵýdyń bar aıla-tásilin jasaǵanymen, oılaǵan oılary dittegen jerlerine jete qoımady.
Match aıaqtalǵannan keıin aǵylshyndardyń bas jattyqtyrýshysy Roı Hodjsonnyń qyzmetinen bosatylǵany resmı túrde habarlandy.
Aıan ÁBDÝÁLI.