Birneshe kúnnen beri bárimiz NASA jarııalaǵan Jerdiń, Aıdyń tańǵajaıyp sýretterinen kóz ala almaı otyrmyz. «Mynaý bizdiń úıimiz» dep óz planetamyzdy syrtynan kórý sózsiz tolqytady. Sol bir shardyń ishinde bizdiń de júregimiz soǵyp tur. Bizdiń de izimiz bar. «Adamǵa tabyn, Jer, endi!» dep Oljas (Súleımenov) jyrlaǵandaı, bizdiń de qııalymyz sol ǵaryshkerlermen birge Aıǵa bir-aq ushty.
«Artemıda-2» ǵarysh mıssııasy barysyndaǵy bul kadrlardy astronavtar Aıdyń arǵy betin aınalyp ushý kezinde túsirgen. Bir sýrette Jerdiń Aı kókjıegine batyp bara jatqan sáti beınelense, ekinshisinde Aı Kúndi tolyq jaýyp qalǵan kezdegi kún tutylýy kórinedi. Bul endi bir ǵajaıyp kórinis. Jerde mundaı tutylýdyń tolyq fazasy birneshe mınýtqa ǵana sozylsa, «Orıon» ekıpajy ony 57 mınýt boıy baqylaǵan.
Endi bir kadrda Jer tolyǵymen kók jáne qońyr túske boıalǵan. Polıar shuǵylasynyń jasyl tústi jarqyly da baıqalady. NASA ǵalymdarynyń aıtýynsha, planeta bozǵylt kók tústi, bulttarmen shaǵylysqan jaryqtan paıda bolǵan názik kógildir shuǵyla kórinedi.
Mıssııa quramyndaǵy tórt astronavt seısenbige qaraǵan túni Jer serigin aınalyp ótti. Olar Aı orbıtasynda jeti saǵat boıy bolǵan. Osy ýaqyt ishinde «Orıon» ǵarysh kemesi Jerden rekordtyq qashyqtyqqa alystap, 40 mınýtqa deıin Hıýstondaǵy basqarý ortalyǵymen baılanysqa shyqqan joq. Olar Aıdyń Jerden kórinbeıtin arǵy betin aınalyp ótip, rekordtyq qashyqtyqqa jetti. Buǵan deıingi rekordty 1970 jyly «Apollon-13» mıssııasy jasaǵan edi.
Bul joly ǵarysh kemesi Jerden 406 myń shaqyrymnan astam qashyqtyqqa deıin alystady. Ushý kezinde «Orıon» kemesi Aı betine shamamen 6 550 shaqyrymǵa deıin jaqyndaǵan. Kemede túrli kásibı kamera, sondaı-aq GoPro qurylǵylary ornatylyp, barlyq sát úzdiksiz túsirilgen. Mıssııa barysynda jaryq azaıtylyp, ıllıýmınatordaǵy shaǵylysý tómendetilgen.
Endi ekıpajdy atmosferaǵa enip, muhıtqa qoný maqsaty kútip tur. Qoný 11 sáýir kúni Grınvıch ýaqytymen 01:07-ge josparlanǵan.