Parlament palatalarynyń birlesken otyrysynyń ekinshi oqylymynda depýtattar alty Konstıtýsııalyq zańdy qabyldady, dep habarlaıdy Egemen.kz.
Parlament alǵashqy kezekte jańartylǵan Konstıtýsııa aıasynda ázirlengen «Qazaqstan Respýblıkasynyń Prezıdenti týraly» Konstıtýsııalyq zańdy maquldady. Qujatta Prezıdent memlekettiń joǵary laýazymdy tulǵasy retinde aıqyndalyp, bılik tarmaqtarynyń úılesimdi jumysyn qamtamasyz etetin, Konstıtýsııa men azamattardyń quqyqtary men bostandyqtarynyń kepili retinde belgilengen. Zańda kezekten tys saılaý ınstıtýtynyń joıylýyna baılanysty Prezıdentti saılaý tártibi, ant berý rásimi jáne ókilettik merzimi naqtylanǵan.
Budan bólek, Parlament «Qazaqstan Respýblıkasynyń Quryltaıy jáne onyń depýtattarynyń mártebesi týraly» jáne «Qazaqstan Halyq Keńesi týraly» Konstıtýsııalyq zańdardy da ekinshi oqylymda qabyldady. Májilistiń málimetinshe, jańa zań bir palataly Parlament – Quryltaıdyń konstıtýsııalyq-quqyqtyq negizderin aıqyndaıdy. Quryltaı 5 jyl merzimge saılanatyn 145 depýtattan turady.
Qazaqstan Halyq Keńesine ishki saıasat boıynsha usynystar ázirleý, Quryltaıǵa zań jobalaryn engizý, referendým ótkizý bastamasyn kóterý jáne memleket pen azamattyq qoǵam arasyndaǵy dıalogty damytý ókilettikteri beriledi. Sondaı-aq organǵa Álemdik jáne dástúrli dinder kóshbasshylary sezin uıymdastyrý mindeti júkteledi. Keńestiń joǵarǵy organy – Sessııa bolady.
Astana mártebesin aıqyndaǵan zań jobasynda elorda máslıhaty sheteldik jergilikti ókildi organdarmen baılanys ornatý, qala qurylysy qujattaryn bekitý jáne jer telimderin ıelikten shyǵarý sııaqty máselelerdi qaraıdy. Al ákimdikke qala qurylysy jobalaryn baqylaý, apattyq turǵyn úılerdi buzýdy uıymdastyrý, qalanyń arhıtektýralyq kelbetin qalyptastyrý jáne jol qozǵalysyn uıymdastyrý shemalaryn ázirleý sııaqty mindetter júkteledi.
Sondaı aq Qazaqstan Respýblıkasynyń ákimshilik-aýmaqtyq qurylysy týraly» zań jobasynda oblystar, aýdandar, qalalar, aýyldar jáne ózge de eldi mekenderdiń mártebesi aıqyndalyp, olardy qurý, qaıta uıymdastyrý jáne taratý tártibi bekitilgen. Zańǵa sáıkes, ákimshilik-aýmaqtyq ózgerister áleýmettik-ekonomıkalyq kórsetkishter negizinde qaralady. Sonymen qatar ákimshilik birlikter men olardyń shekaralaryn «Mekenjaı tirkelimi» júıesinde esepke alý jáne tirkeý tártibi engiziledi.
Sońǵy «Birqatar konstıtýsııalyq zańdardy Konstıtýsııaǵa sáıkestendirý týraly» zań jobasy saılaý naýqandary kezinde anyqtalǵan máselelerdi eskere otyryp ázirlengen.
Qujatta ákimshilik-aýmaqtyq birlikter qaıta qurylǵan jaǵdaıda saılaý komıssııalarynyń ókilettikterin saqtaý jáne aýysý tártibin retteý kózdelgen. Sonymen qatar aýmaqtyq saılaý komıssııasy músheleriniń bala kútimine nemese oqý demalysyna shyǵýyna baılanysty olardyń ókilettikterin ýaqytsha toqtatyp, ornyna ýaqytsha múshe taǵaıyndaý tetigi engiziledi.
Zań jobasynda ákimdikke kandıdattardyń daýystary teń túsken jaǵdaıda qaıta daýys berý tártibi de aıqyndalǵan. Budan bólek, kandıdattardy usyný rásimi júıelenip, bir azamattyń bir ýaqytta máslıhat depýtattyǵyna jáne ákim laýazymyna túsýine, sondaı-aq birneshe saılaý okrýgi boıynsha ákimdikke kandıdat bolýyna shekteý qoıylady.