Almaty oblysynda týrızm salasyn damytý maqsatynda Alakól aýdanynyń ortalyǵy Úsharal qalasynda 50 jolaýshyǵa qyzmet kórsetetin aerovokzal salý úshin jer telimi bekitilip, jobalyq smetalyq qujattary daıyndaldy.
Jalpy, Alakól jaǵalaýyna 3,1 mlrd. teńgeniń ınvestısııasy tartylyp, 1200 oryndy 3 demalys kesheniniń qurylysy qarqyndy júrýde. О́tken jyly kól jaǵalaýyndaǵy 102 demalys ornynda 144 000 adam demalyp, olarǵa 612 mln. teńgeniń qyzmeti kórsetilgen edi. Bıyl taǵy 26 demalys ornyn iske qosý josparlanyp, 220 myń adam keledi dep kútilýde. Demalys úıleriniń quny 3500-6500 teńge kóleminde bolady. Zaman talabyna saı salynǵan oryndar 11000-60000 teńgege deıin baǵalanyp otyr.
Alakólge áýe jolynan bólek, temirjol, avtomobıl joly da bar. Kólik qoljetimdiligimen qamtamasyz etý maqsatynda bıylǵy jazǵy demalys maýsymynda «Almaty-Dostyq» baǵytynda júretin týrıstik poıyzy aptasyna 3 ret qatynaıdy. Al «Almaty-Úsharal-Aqshı-Kóktuma» marshrýty boıynsha kúnine 5 avtobýs jolaýshylardy tasymaldaıdy.
Nurbol ÁLDIBAEV,
«Egemen Qazaqstan»
Almaty oblysy,
Alakól aýdany