Jýrnalısterdiń kásibı merekesine oraı bılıardtan jazýshy, jýrnalıst, ǵalym, professor Aqseleý Seıdimbekti eske alýǵa arnalǵan dástúrli respýblıkalyq týrnır ótti. Oǵan BAQ salasynyń 60-qa jýyq ókili qatysty.
Týrnırdiń ashylý saltanatynda L.N.Gýmılev atyndaǵy Eýrazııa ulttyq ýnıversıteti janyndaǵy «Jýrnalıstıka máselelerin zertteý» ınstıtýtynyń dırektory Namazaly Omashev jarystyń mańyzy men ereksheligin keńinen aıtyp berdi.
«Aqseleý Seıdimbek atyndaǵy bılıard saıysy osymen altynshy márte uıymdastyrylyp otyr. Týrnırdiń ótýine atalǵan bilim ordasynyń kásipodaq komıteti muryndyq bolyp, demeýshilik kórsetti. Odan bólek, Aqseleý aǵamyzdyń inisi Asylhan Seıdimbek áýleti atynan arnaıy syılyq tapsyrady», – dedi ol.
Munan keıin ýnıversıtettiń «Jýrnalıstıka jáne saıasattaný» fakýltetiniń dekany Qaırat Saq sóz alyp, jarysqa qatysýshy aqsaqaldar toby – 24, orta býyn ókilderi men jastardan quralǵan oıynshylar 32 saıyskerden turatynyn jetkizdi.
«Bul týrnır eń alǵash 2009 jyly Aqseleý aǵamyzdyń bastamasymen BAQ ókilderi arasynda uıymdastyryldy. Maqsaty – jýrnalıstıkanyń qazanynda qaınap júrgen jáne qolyndaǵy qalamyn qarý etken qalamgerlerdiń basyn qosyp, kásibı merekeniń qarsańynda bir sergip qalý. Osy rette, aǵamyz óziniń atynan týrnır jeńimpazyna aqshalaı júldesin berip, dástúrli sharaǵa muryndyq boldy. Al 2010 jyldan beri biz osy saıysty Ahańnyń atynan ótkizip kelemiz. Jyl saıyn bılıardqa qyzyǵýshylyq tanytyp, jarysqa qatysýǵa nıet bildirgen oıynshylar qatary artyp keledi. Búgingi sharaǵa «Qazaqstan» ulttyq telearnasy» men Aqseleý aǵa eńbek etken «Egemen Qazaqstan» gazeti jarys jeńimpazdaryna arnaıy júlde taǵaıyndady. Jalpy, biz kelesi jyly Aqseleý aǵamyzdyń 75 jyldyǵyna oraı týrnır aýqymyn ulǵaıtyp, dúbirletip ótkizemiz be dep otyrmyz», – dedi Qaırat Saq óziniń sózinde.
Sonymen, jeti saǵatqa sozylǵan saıysta aqsaqaldar tobynan 1-oryndy Namazaly Omashev jeńip alsa, 60 jasqa deıingi oıynshylar ishinen úzdik shyqqan telejýrnalıst Nurdildá Oraz top jardy. Olarǵa týrnırdiń bas syılyǵy – kýboktar men baǵaly syılyqtar tabys etildi. Týrnırde, sondaı-aq, budan da basqa atalymdar boıynsha úzdikter anyqtalyp, tıisti syı-sııapattarǵa ıe boldy.
Talǵat RAIYMBEK,
«Egemen Qazaqstan»