[caption id="attachment_52792" align="aligncenter" width="560"] dailynews.kz[/caption]
«Týr de Frans» kópkúndigindegi jarys kún ótken saıyn qyza túsýde. «Astana» komandasynyń jeńiske degen jigeri kúshti. Mysaly, Vınchenso Nıbalıdiń ózi 19-kezeńde aıaq astynan qulaǵan qaramastan, sońǵy sheshýshi kezeńde Fabıo Arýdyń úzdikter qatarynan kórinýge kómektesýge daıyn ekendigin aıtty. Bul týraly egemen.kz saıtyna jarystyń ortasynda júrgen áriptesimiz Dına Ysqaqova habarlady.
«Nıbalı – optımıst sportshy. Ol «Týr de Frans» kópkúndiginiń aıaqtalýǵa jaqyn ekenin, kezeń aýyr bolǵanyna qaramastan ózin jaqsy sezinetinin, komandaǵa 19-shy kezeńniń ońaı bolmaǵanyn aıtty. Sonymen birge ol jarysta qulap qalǵanyn, biraq «Astana» komandasynyń jeńiske jetýge baryn salyp jatqanyn, Fabıo Arýdyń jalpy esepte úzdikter qatarynan kórinýge kómektesý basty mindeti ekenin jetkizdi», dedi áriptesimiz.
«Ári qaraı ol jarysta Frýmenniń qulaǵanyn kórip, toqtaýǵa tyrysqanyn, alaıda rýlge ıe bola almaı qalǵanyn aıtty. Nıbalı 20-shy kezeńniń ońaı bolmaıtynyn, tipti búgingi kezeńnen de aýyr bolýy múmkin ekenin de jasyrmady. Soǵan qaramastan ol jeńiske umtylatyndaryn, oǵan komandanyń shamasy jetetinin atap ótti», dedi jýrnalıst. Áriptesimizge ol: «Qulaǵanǵa deıin ózimdi jaqsy sezindim. Kezeńnen kezeńge deıin daıyndyǵym jaqsy bolatyn. Búgingi kezeń maǵan ońaı bolǵan joq. Jarys aıaqtalysymen daıyndyǵymdy qaıta jalǵastyramyn. Olımpııa oıyndarynda júldege talasýǵa shamam jetý kerek», degen eken.
Dastan KENJALIN