Oqý-aǵartý mınıstrligi halyqaralyq olımpıadalar men ǵylymı jobalar baıqaýlarynyń jeńimpazdaryna jáne olardyń ustazdaryna beriletin birjolǵy syıaqy tóleý tártibin jańartty. Tıisti buıryq 2026 jylǵy 30 naýryzda qabyldanyp, 21 sáýirden bastap kúshine enedi, dep habarlaıdy Egemen.kz.
Jańa erejege sáıkes, tólemderdi taǵaıyndaýshy organ retinde Oqý-aǵartý mınıstrligi belgilendi. Syıaqy tek aǵymdaǵy jyldyń jetistikteri úshin beriledi jáne bir jyl ishinde qaıta taǵaıyndalmaıdy. Tólemdi tek Qazaqstan Respýblıkasynyń azamattary ala alady.
Syıaqyǵa halyqaralyq pándik olımpıadalardyń jeńimpazdary men júldegerleri, sondaı-aq halyqaralyq ǵylymı jobalar baıqaýlarynyń qatysýshylary jáne olardyń jetekshi pedagogtary úmitker bola alady. Qatysý úshin arnaıy anketa toltyrylady, al kámeletke tolmaǵandardyń derekterin zańdy ókilderi rastaıdy.
Akademık Asqar Jumadildaevtyń mereıtoıyna oraı jas matematıkter arasynda olımpıada ótti
Tólem mólsheri jetistik deńgeıine qaraı belgilengen. I dárejeli dıplom men altyn medal ıegerleri 1500 AEK, ıaǵnı 2026 jyly 6 487 500 teńge alady. II dárejege – 1000 AEK (4 325 000 teńge), III dárejege – 500 AEK (2 162 500 teńge) qarastyrylǵan.
Sonymen qatar halyqaralyq ǵylymı jobalar baıqaýlarynyń jeńimpazdaryna da 1500 AEK kóleminde syıaqy beriledi.
Jeńimpazdardy daıyndaǵan pedagogtarǵa da qosymsha tólem qarastyrylǵan: altyn medal ıegeri úshin – 26,5 BDO, kúmis úshin – 17,5 BDO, qola úshin – 8,5 BDO kóleminde.