[caption id="attachment_52813" align="aligncenter" width="560"] Foto: ria.ru[/caption]
Aýǵanstan astanasy Kabýl qalasynda joıqyn jarylys boldy. Osynyń saldarynan 80-nen astam adam qaza taýyp, 200-ge jýyǵy zardap shekti. RIA «Novostı» aqparat agenttiginiń málimetine sáıkes, oqys oqıǵa halyq kóbirek shoǵyrlanǵan jerde bolǵan.
Alǵashynda 60 adamnyń qaza tapqany týraly habarlanǵan. Alaıda, Aýǵanstannyń ishki ister mınıstrligi olardyń qatary 80-nen asqanyn málimdedi.
TASS aqparat agenttiginiń habarlaýynsha, jınalǵan jurt Bamıan provınsııasyn elektrmen jabdyqtaý jumysyn keıinge qaldyrǵany úshin narazylyqtaryn bildirgen eken. Dál osy kezde jankeshtilerdiń biri ózin-ózi jaryp jibergen. Budan bólek taǵy eki sodyr lańkestik áreketin júzege asyrmaq bolypty. Alaıda, bireýiniń jarylǵysh zaty iske qosylmaı qalsa, ekinshisin kúshtik qurylym ókilderi der kezinde baıqap aldyn alǵan.
Kóp uzamaı terrorlyq shabýyldy DAISh lańkestik tobynyń sodyrlary jasaǵany belgili boldy. Keıbir málimetterde Kabýl qalasynda eki birdeı jarylys bolǵany aıtylady. Alaıda, bul ázirge resmı túrde habarlanǵan joq.
Aıan ÁBDÝÁLI