Máskeýde turatyn jas grýzınder keńesiniń lıderleri «მე შენ მიყვარხარ»/ «Men seni súıemin» degen Reseı-Grýzııa birikken jobasyn júrgizip jatyr.
«Sputnik-Grýzııa» agenttiginiń tilshisi Alena Saveleva osyǵan oraı jobany uıymdastyrýshylardyń birine jolyǵyp, oǵan birneshe suraq qoıdy. Jaýapty Reseıdegi federaldy ulttyq-mádenıet avtonomııasy janyndaǵy grýzın bólimshesi jas lıderleri keńesiniń kýratory, MGÝ-diń jýrnalıstıka fakýltetiniń túlegi Sandro Ivanov berdi.
- Andro, óz jobalaryńyz týraly taldap aıtyńyzshy. Onyń máni nede?
-Jobanyń máni barynsha qarapaıym. Oǵan árbir qatysýshy jas qyz ben jigit óziniń eń jaqyn adamdaryna – ata-anasyna, eń jaqyn basqa da adamdaryna jeke-jeke bar bolǵany «მე შენ მიყვარხარ» nemese «Men seni (sizdi) súıemin» dep aıtady. Kelisetin shyǵarsyz, ákeń men shesheńe nemese basqa bir súıikti adamyńa dál mundaı sóz aıtý pálendeı qıyndyq týǵyza qoımaıtyn shyǵar. Munyń esesine, osyndaı sóz estigen adam barynsha máz bolyp qalady. Ol adamnyń kóńil kúıin kúrt kóterip jiberedi. Biz jobany sondyqtan da jastardy óz jaqyndaryna osy sózdi jıi aıtyp úırenýlerine daǵdy aldyrý maqsatynda ómirge engizdik. Jáne bul sózdi orys nemese grýzın tilderinde ǵana emes, jastar ózderi qarym-qatynas jasaı alatyn kez kelgen tilde bildire alady.
- Mundaı joba jasaý jónindegi ıdeıa qalaı týyp júr?
-Osyǵan uqsas aksııa, sál basqasha pishimde, budan aldyn Tbılısıde ótken bolatyn. Onda «Imedı» telearnasynyń jýrnalısteri kóshede ketip bara jatqan júrginshilerge jolyǵyp, ózderiniń ata-analarynyń attaryn atap berýdi ótingen edi. Maǵan osy sıýjet qatty unap qaldy. Sosyn jigittermen aqyldasa otyryp, osyǵan uqsas, biraq kóteretin júgi men mazmuny sál basqasha bir jobany oılap tabýǵa sheshim qabyldadyq. Oılana kelgende, osy ıdeıa týyndady.
-Sondyqtan rolık túsirip kórdińizder ǵoı?
-Iá. Negizi, jobanyń ıdeıasy 19 maýsym kúni qolǵa alynǵan edi. Sol kúni biz, keńes músheleri, Georgıı skverindegi Shota Rýstavelı eskertkishi janyna jınalyp, aldymen óz ata-analarymyz ben jaqyndarymyzǵa telefon shalyp, olarǵa ózderin súıetinderimizdi jetkizdik. Áser keremet boldy. Sol sáttiń bárin túsirip alyp, vıdeoǵa jınaqtadyq. Nátıjesinde 30-ǵa jýyq adam rolıkke kirdi.
-Jobany budan ári de jalǵastyra beresizder me?
-Sózsiz. Biz bul jobany sonymen qatar Sankt-Peterbýrgtegi «Tergdaleýlebı» | «თერგდალეულები» grýzın jastary uıymyna usyndyq. Olar da qazir osyndaı rolık daıyndap jatyr. Budan bólek, Vladıkavkazdaǵy grýzın jastary da bastamaǵa qosylmaqshy bolyp otyr.
Damır QOJAMQUL
https://youtu.be/cvuAXwDKgH0