Shveısarııanyń Lozanna qalasynda búgin, 24 shilde kúni ótken Halyqaralyq Olımpııalyq komıtettiń telekonferensııasy barysynda Reseı qurama komandasyn Rıo-de-Janeırodaǵy Olımpııalyq oıyndardan tolyǵymen alyp tastamaý jóninde sheshim qabyldandy. HOK-tyń saıtynda osy týraly jazyldy.
Sonymen birge, komıtet jekelegen sport túrleri boıynsha naqtyly sportshylar men komandalardy jarysqa jiberý jónindegi ókildikti tıisti halyqaralyq federasııalarǵa tapsyrdy.
Buǵan deıin, 24 shilde kúni Reseı BAQ-tary, Brıtanııa baspasózi basqasha habarlaǵanyna qaramastan, HOK-tyń Reseı quramasyn Olımpıadaǵa jiberetinin jazǵan edi.
Al 21 shilde kúni Halyqaralyq arbıtrajdyq sot (CAS) Reseı olımpııalyq komıteti men jeńil atletteriniń Halyqaralyq jeńil atletıka assosıasııasynyń ústinen bergen shaǵymyn qaramaı tastaǵan bolatyn. Onda 68 shaǵymnyń ishinen tek sońǵy úsh jylda AQSh-ta jattyǵyp júrgen uzyndyqqa sekirýshi Darıa Klıshınanyń ǵana shaǵymy qanaǵattandyryldy.
18 shilde kúni Búkilálemdik antıdopıngilik agenttiktiń (WADA) kanadalyq zańger Rıchard Maklaren basqaratyn táýelsiz komıssııasy 2014 jyly Sochıde ótken qysqy Olımpııalyq oıyndardaǵy dopıngilik qıturqylyqtardy aıyptaýdy tekserýdiń qorytyndylary týraly baıandamasyn usyndy. Onyń qorytyndysy boıynsha WADA Reseıdiń barlyq sportshylaryn 2016 jylǵy Oıyndardan alastaýǵa, sondaı-aq eldiń sport mınıstri Vıtalıı Mýtkony otstavkaǵa jiberýge shaqyrdy.
Damır QOJAMQUL